Azərbaycan, Bakı, 10 sentyabr / Trend , müxbir A.Bədəlova/ Çərşənbə günü Bakıda multimodal nəqliyyatın inkişafı üzrə seminar öz işinə başlayıb. Seminar İslam İnkişaf Bankı, Regionda Multimodal Daşımalar Təşkilatı, BMT-nin ticarət və inkişaf üzrə konfransı, həmçinin BMT-nin Asiya və Sakit okean ölkələri üzrə iqtisadi və sosial Komissiyasının birgə layihəsi çərçivəsində keçirilir.
Multimodol daşımalarda iştirak edən ölkələrin mövcud nəqliyyat növlərinin fəaliyyəti, həmçinin beynəlxalq nəqliyyat sisteminə inteqrasiyanın təmin edilməsi məsələləri seminarda əsas müzakirə mövzusu olacaq. Seminarda həmçinin, transavropa, transasiya dəmir yolları və avtomobil yolları şəbəkələri üzrə tranzit daşımaları zamanı fiziki və qeyri-fiziki məneələrin aşkarlanması və aradan qaldırılması problemi də müzakirə olunacaq.
Azərbaycan Nəqliyyat Nazirliyinin Nəqliyyat siyasəti və iqtisadiyyat üzrə şöbəsinin müdiri Sədrəddin Məmmədovun sözlərinə görə, keçirilən seminarın rolu ölkənin mühüm coğrafi mövqedə yerləşməsi baxımından əhəmiyyətlidir, bu gün - həm enerji sahəsində, həm də ticarət və nəqliyyatın sadələşdirilməsi sahəsində alternativ yolların axtarıldığı qloballaşma dövründə multimodal daşımaların inkişafı böyük əhəmiyyətə malikdir.
Məqalə müəllifi ilə əlaqə ünvanı - capital
