Azərbaycan, Bakı, 31 oktyabr/ Trend , müxbir İ.Xəlilova/ "Azərbaycan Milli Bankının (AMB) uçot dərəcələri, xarici və bank öhdəlikləri üzrə məcburi ehtiyat normalarının azaldılmasına dair bu gün qəbul edilən qərarı ölkənin bank sektorunun kredit siyasətinin canlanmasına səbəb olacaq", - AMB İdarə Heyəti sədrinin müavini Rüfət Aslanlı cümə günü bildirib.
"Ümid edirik ki, bu addım kredit dərəcələrinin azalmasına da təsir göstərəcək", - Aslanlı bildirib.
AMB İdarə Heyətinin qərarı ilə oktyabrın 31-dən uçot dərəcəsi 12% - dən 10% - ə, faiz dəhlizinin yuxarı həddi 17% - dən 15% -ə, dəhlizin aşağı həddi 3% - dən 1% - ə endirilib. Noyabrın 3 - dən həm millli, həm də xarici valyutada bank öhdəlikləri üzrə məcburi ehtiyat normaları 12 faizdən 9 faizədək azaldılacaq, xarici öhdəliklər üzrə məcburi ehtiyat norması beş faizdən 0-a endiriləcək.
"Məcburi ehtiyat normalarının azaldılması bank sektoruna 220 mln. manat əlavə likvidlik gətirəcək ki, bu da bank aktvilərinin 20 faizindən çoxunu təşkil edir", - İdarə Heyəti sədrinin müavini əlavə edib.
Əlavə ehtiyatlar dünya maliyyə böhranının təsiri altında xarici borclanmaların cəlb edilməsi ilə bağlı problemlər yaşayan bankların imkanlarını genişləndirəcək. Böhran nəticəsində banklar kreditləşdirmə həcmini azaldıb, bəzi banklar müəyyən müddətədək istehlak və ipoteka kreditlərinin verilməsini dayandırıblar.
"Belə vəziyyət qlobal bazarlardan böyük həcmdə informasiya axını altında özlərini sığortalamaq istəyən bankların ehtiyatlılığı ilə əlaqədar yaranıb, - Aslanlı vurğualyıb. Bu gün hər bir vətəndaş itkilərdən qaçmaq naminə öz əmanətini saxlamaqda valyuta seçimi ilə bağlı çətinliklər yaşayırsa, təbiidir ki, 10 milyardlarla aktivi idarə edən bank sektoru dünya maliyyə bazarlarında gərginlik dövründə ehtiyatlı olmaq qərarına gəlib".
Bank aktivlərinin ümumi həcmindən 8 mlrd. manat cəlb edilmiş vəsaitlərin payına düşür.
Müəyyən fasilədən sonra banklar, risklərin minimallaşdırılmasını nəzərə almaqla, kreditləşdirməni bərpa ediblər. Yalnız sentyabrda bankların ölkə iqtisadiyyatına yatırımları 645 mln. manat təşkil edib. Bu vəsaitlərin bir hissəsi istehsal və biznes - kreditlərin verilməsinə yönəldilib.
"Banklar iqtisadiyyatın kreditləşdirilməsini davam etdirsələr də, bunu daha ehtiyatlı və düşünülmüş formada həyata keçirirlər, - sədr müavini bildirib. - Güman edirik ki, bu fəallıq daha yüksək ola bilərdi və bankların ehtiyatlılığı heç də arzuolunan yanaşma olmasa da, 220 mln. manat həcmində əlavə likvidliyin təmin edilməsi üzrə son tədbirlər kreditləşdirmədə fəallığın dəstəklənməsinə yönəldilib".
Müəlliflə əlaqə saxlamaq üçün elektron ünvan: [email protected]