Azərbaycan, Bakı, 05 noyabr/ Trend , müxbir Ü.İsmayılova/ Azərbaycanın Əmək və Əhalinin Sosial Müdafiəsi Nazirliyi yanında Əmək Müfəttişliyi Azərbaycan ərazisində xarici vətəndaş və Azərbaycan vətəndaşlığı olmayan şəxslərin xüsusi icazə olmadan işə qəbulu hallarının qarşısnın alınması ilə bağlı işləri gücləndirməldir. Bu barədə əmək naziri Fizuli Ələkbərov bildirib.
"Miqrasiya haqqında" Qanuna müvafiq olaraq, Azərbaycan ərazisində əmək fəaliyyətinə başlamaq üçün işverən, fərdi qaydada hər bir əcnəbi işçidən ötrü Nazirlik nəzdində Əmək Miqrasiya Xidmətindən xüsusi razılıq almalıdır. Yalnız bundan sonra bu əcnəbi işə başlaya bilər.
Nazir müfəttişliyə iqtisadiyyatın bütün sahələrində, xüsusilə də, tikinti sahəsində əmək müqavilələlrinin bağlanılması və əmək haqqının düzgün göstərilməsi üzərində nəzarəti artırmağı tapşırıb.
İclasda idarə rəhbəri işçi hüquqlarının müdafiəsi sahəsində Əmək Müfəttişliyi qarşısında duran məsələləri müzakirə edib. Müfəttişliyin rəhbəri Nəbi Şükürlü ötən 10 ayda görülən işlər barədə məlumat verib.
Ələkbərovun sözlərinə görə, müfəttişliyin səlahiyyətli şəxslərinə qarşı tələblərin artırılmasına lüzum yaranıb. Nazir bununla əlaqədar iş rejimində fəaliyyətin gücləndirilməsinə dair tapşırıq verib.
Azərbaycanın Əmək və Əhalinin Sosial Müdafiəsi Nazirliyi yanında Əmək Müfəttişliyi tərəfindən aparılan monitorinqin nəticələrinə görə, yanvar-sentyabrda istehsal işləri zamanı 190 bədbəxt hadisə baş verib, onlardan 49 -u tikinti sektoruna aiddir. Bədbəxt hadisələr nəticəsində 50 nəfər ölüb, 161 nəfər müxtəlif dərəcəli xəsarətlər alıb.
Azərbaycanın tikinti sektorunda yoxlamalar 2007- ci ilin avqustunda 25 nəfərin ölümü ilə nəticələnən tikilməkdə olan 16 mərtəbəli binanın uçmasından sonra fəallaşdırılıb. Hadisə yerini tədqiq edən ekspertlər hesab edirlər ki, binanın uçmasına səbəb olan amillərdən biri texniki təhlükəsizlik qaydalarının pozulması olub.
Azərbaycanın Əmək və Əhalinin Sosial Müdafiəsi Nazirliyi yanında Əmək Müfəttişliyi istehsalatda əmək şəraitini müntəzəm tədqiq edən orqandır.
Məqalə müəllifi ilə əlaqə ünvanı - [email protected]