Azərbaycan, Şəki, 26 yanvar/ Trend , müxbir X.Əkbərova/
Bu gündən Şəkidə (Azərbaycanın şimal-qərbində, Bakıdan 352 km məsafədə yerləşir) şəhərin su təchizatı və kanalizasiya sisteminin təkmilləşdirilməsi layihəsi üçün texniki-iqtisadi əsaslandırmanın həyata keçirilməsi başlayıb. Layihə Alman İnkişaf Bankı-KfW və İsveçrənin İqtisadi Əlaqələr üzrə Dövlət Katibliyi Seco tərəfindən maliyyələşdirilir, - "Şəki su-kanal" ASC-dən bildiriblər.
Layihəyə əsasən, bu gündən Şəki rayonunun ərazisindən keçən Kiş və Gürcana çaylarında drenaj şəbəkələrinin quraşdırılması başlayıb.
Qurğular işə salındıqdan sonra Kiş çayından şəhərə saniyədə 200 litr, Gürcana çayından 23 litr su vermək mümkün olacaq. Nəticədə Şəki içməli su ilə fasiləsiz təmin olunacaq.
Yenidənqurma işləri iki mərhələdə həyata keçiriləcək. 2010-cu ilin sonunadək başa çatacaq birinci mərhələdə şəhərlilərin 75 faizi içməli su ilə, 70 faizi isə kanalizasiya sistemi ilə təmin olunacaq. İkinci mərhələ çərçivəsində artıq Kiş və Gürcana çaylarında geoloji kəşfiyyat işləri aparılır.
Ümumilikdə layihə Gəncə və Şəki şəhərlərində su təchizatı və kanalizasiya sisteminin keyfiyyəti və etibarlılığının təkmilləşdirilməsini nəzərdə tutur. Layihənin birinci mərhələsinin büdcəsi 55 mln. avro təşkil edir. 2006-cı ilin oktyabrında Berndə imzalanmış müqavilələrə əsasən, KfW layihənin həyata keçirilməsinə 37 mln. avro, Seco qrant şəklində 10 mln. avro ayıracaq. Azərbaycan hökumətinin layihədəki payı 8 mln. avro təşkil edir.
Müəlliflə əlaqə saxlamaq üçün elektron ünvan: [email protected]
