Azərbaycan, Bakı, 16 mart / Trend , müxbir Ü.İsmayılova /
"Azərbaycan sığorta şirkətlərinə antiböhran tədbirləri çərçivəsindəki fəaliyyətləri zamanı sığorta məhsullarını maksimum sadələşdirmək lazımdır", - bazar ertəsi "Qarant Sigorta" şirkətinin idarə heyətinin sədri Vaqif Həsənov deyib.
"Məhsullar o qədər sadələşdirilməlidir ki, alıcı sığorta üzrə müqavilə imzalamaq üçün razılığını maksimal dərəcədə tez versin", - Həsənov bildirib.
Onun sözlərinə görə, dünyanın inkişaf etmiş bazarlarında sığorta müqaviləsinin cəmi 10 dəqiqə ərzində bağlanmasına baxmayaraq, Azərbaycanda bu, sığorta növündən asılı olmayaraq ən azı üç saat çəkir.
"Bazarın fəallaşdırılmasının yeganə yolu bazardakı xidmətin yaxşılaşdırılmasıdır", - Həsənov qeyd edib.
Bu məsələnin həlli yollarında atılmalı olan addımlardan biri hazırda Azərbaycan Maliyyə Nazirliyi tərəfindən 2008-ci ilin martında qəbul edilmiş "Sığorta fəaliyyəti haqqında" qanuna uyğun olaraq həyata keçirdiyi sığorta agentləri və vasitəçilərin lisenziyalaşdırılmasıdır.
"Ölkə hakimiyyətinin bu addımı bazarın artım dinamikasına əhəmiyyətli dərəcədə təsir edəcək, həmçinin bu tədbirlər nəticəsində bazarda yalnız peşəkarlar fəaliyyət göstərəcək", - Həsənov bildirib.
Maliyyə Nazirliyinin keçirdiyi imtiahanlarda indiyə qədər sığorta agenti-vasitəçi vəzifəsinə namizəd olan 255 nəfər iştirak edib. Onlardan yalnız 93 nəfər bu mərhələni uğurla adlayıb.
Məqalə müəllifi ilə əlaqə ünvanı: [email protected]