Azərbaycan, Bakı, 29 aprel / Trend , müxbir Ü.İsmayılova /
Qətər, Azərbaycanın sığorta-pensiya sistemi sahəsində təcrübəsini öyrənmək niyyətindədir. Bu barədə Qətərin Azərbaycandakı fövqəladə və səlahiyyətli səfiri Mübarək bin Fəhd Cəsim Əl-Səni Dövlət Sosial Müdafiə Fondunun (DSMF) rəhbəri Səlim Müslümov ilə görüşdə bildirib.
"Azərbaycanın sığorta-pensiya sistemində aparılan islahatlar məni ciddi maraqlandırır", - deyə səfir bildirib.
Diplomat səfər zamanı bildirib ki, Azərbaycanın təcrübəsini öyrənmək və Qətərdə tətbiq etmək üçün bir sıra tədbirlər görəcək. Səfir bu məqsədlə yaxın vaxtlarda Qətərın Sosial Təminat Təşkilatının nümayəndə heyətinin Bakıya səfərini təşkil etmək niyyətindədir.
Fond rəhbəri Azərbaycanda sığorta-pensiya sisteminin yaxşılaşdırılması üçün aparılan islahatlar və planlar barədə səfirə ətraflı məlumat verib. İslahatların ikinci mərhələsi 2009-2015-ci illərdə sığorta-pensiya sisteminin inkişafı üzrə Dövlət Proqramı çərçivəsində həyata keçirilir.
Məqalə müəllifi ilə əlaqə ünvanı - [email protected]