Azərbaycan, Bakı, 27 may / Trend , müxbir Ü.İsmayılova /
Yaxın bir ayda Azərbaycan daşınmaz əmlakın qeydiyyatında tam olaraq "vahid pəncərə" sisteminə keçəcək. Bu barədə hökumətdəki mənbə bildirib.
"Hazırda sözügedən sistemə keçməkdən ötrü aktiv işlər aparılır", - mənbə deyib.
Onun sözlərinə əsasən, Azərbaycan Daşınmaz Əmlakın Dövlət Reyestri Xidməti ləğv edildikdən sonra digər müvafiq strukturlar işlərini dayandıraraq səlahiyyətlərinin təhvil-təslimini aparır.
Azərbaycan Prezidentinin 19 may tarixli fərmanına əsasən, Azərbaycanda Daşınmaz Əmlakın Dövlət Reyestri Xidməti və Dövlət Əmlakının İdarə Edilməsi üzrə Dövlət Komitəsi ləğv edilib. Digər fərmana əsasən, Əmlak Məsələləri Dövlət Komitəsi yaradılıb və keçmiş Dövlət Əmlakının İdarə Edilməsi üzrə Dövlət Komitəsinin rəhbəri Kərəm Həsənov bu quruma rəhbər təyin edilib.
Mənbənin bildirdiyinə görə, hazırda Daşınmaz Əmlakın Dövlət Reyestri Xidmətində ləğvetmə komissiyası fəaliyyət göstərir. Dövlət xidmətinin beynəlxalq maliyyə institutları ilə birgə layihələrinin aqibəti hələ ki, məlum deyil.
Məqalə müəllifi ilə əlaqə ünvnı: [email protected]
