Gürcüstan, Tbilisi, 24 avqust / Trend , müxbir N.Kirsxaliya /
Qaqra Şəhər Məhkəməsi bu gün Türkiyənin "Buket" gəmisinin kapitanı və dörd azərbaycanlının da olduğu ekipaj üzvlərinin işi üzrə məhkəməni ertələyib. Hakim Qela Kiriyanın qərarı ilə işəbaxılma müdafiə tərəfinin ərizəsi ilə ertələnib.
Günahlandırılanların vəkilləri məhkəmənin başqa vaxta keçirilməsi barədə ərizəni prokurorluq və müttəhimlər arasında prosessual razılaşmanın imzalanması ehtimalı ilə əlaqələndirib. Vəkillər bildirir ki, tərəflər prosessual razılıq əldə edə və cərimə ödəməklə azadlığa buraxıla bilərlər.
Hakim prosessual razılaşmanın imzalanması üçün avqustun 31-dək vaxt verib və məhkəmənin növbəti dinləmələrini məhz bu günə təyin edib.
Gürcüstan dəniz sərhədçiləri tərəfindən saxlanılan Türkiyədən Abxaziyaya gedən "Buket" gəmisinin ekipajı 17 nəfərdən ibarətdir. Onlardan 13-ü Türkiyə, dördü Azərbaycan vətəndaşıdır.
Tankerin kapitanına "Gürcüstan dövlət sərhədinin dəfələrlə pozulması və işğal olunmuş ərazidə gəmiçilik qaydalarının pozulması faktları üzrə" ittiham irəli sürülüb. Gürcüstan DİN-in məlumatına görə, gəmi kontrabanda yolu ilə 2 min ton benzin və 700 ton dizel yanacağı nəql edib.
Azərbaycanın Gürcüstandakı səfirliyinin məlumatına görə, ekipaj hələki gəmidədir və Azərbaycan vətəndaşları Tariyel Nəsirov (1968-ci il təvəllüdlü), Əsgər Əsgərov (1977), Vüsal Həmzəyev (1985) və Əkrəm Zamanov (1981) özlərini yaxşı hiss edirlər. Dənizçilərin heç bir şikayəti yoxdur, səfirlik onlarla mütəmadi əlaqə saxlayır.
Məqalə müəllifi ilə əlaqə ünvanı: [email protected]
