Gürcüstan, Tbilisi, 09 oktyabr / Trend /
Gürcüstan Poti hava limanının səhmlərinin 98,26 faizini satır. Bu barədə Gürcüstanın regional inkişaf və infrastruktur naziri David Tkeşelaşvili hökumət iclası başlamamışdan öncə məlumat verib. Layihəyə bugünkü iclasda baxılacaq.
Söhbət Potidə sənaye zonası inşa edəcək şirkətə səhmlərin birbaşa satılmasından gedir.
Tkeşelaşvilinin sözlərinə görə, layihənin ilk başlanğıc variantı üzrə səhmlər paketinə görə şirkət təxminən bir milyon dollar ödəyəcək. Hava limanının inşasına gəlincə isə, ilkin infrastrukturun qurulması üçün bir neçə milyon dollarlıq investisiya lazımdır.
Şirkətlə razılaşma hələ rəsmiləşdirilməyib. "Hökumət bu layihəni müzakirə edəcək və əgər layihə bəyənilərsə, müvafiq razılaşma ilə rəsmiləşdiriləcək", - Tkeşelaşvili qeyd edib.
