Azərbaycan, Bakı, 15 oktyabr / Trend , müxbir N.İsmayılova/
Azərbaycanda yeganə qızıl hasil edən yeganə şirkət Anglo Asian Mining plc Azərbaycanın Gədəbəy qızıl-mis yatağından hasil edilən təxminən beş min unsiya qızıl ixrac edib. Bu barədə cümə axşamı şirkətin baş direktoru Rza Vəziri bildirib.
"İlin sonuna kimi biz təxminən 40 min unsiya qızıl ixrac etməyi planlaşdırırıq, işimiz hava şəraiti ilə əlaqədar olaraq qrafikdən bir qədər geri qalıb, lakin növbəti ildən 60 min unsiya qızılın ixracı gözlənilir", - Vəziri bildirib.
Onun sözlərinə əsasən, dünya bazarlarında qızılın sonuncu qiyməti şirkətin vəziyyətinə müsbət təsir göstərib.
"Qızılın sonuncu partiyası 10 gün əvvəl 1049 dollar qiyməti ilə satılıb ki, bu da çox yüksək qiymətdir, hazırda qiymət 1063 dollar təşkil edir və bu sözsüz ki, xərclərin və kapital qoyuluşu siyasətinə müsbət təsir göstərəcək", - Vəziri bildirib.
Gədəbəy yatağının işlənməsinə hazırda 70 milyon dollar sərmayə yatırılıb, onun sözlərinə görə, qızılın qiyməti cari səviyyədə saxlanılarsa, o zaman 7-8 il proqnozuna nisbətdə üç il ərzində maya dəyəri çıxarmaq olar.
"Hazırda yeni qızıl olan yataqlarda həmçinin filiz həcminin təhlili üçün tədqiqatlar aparılır", - o bildirib.
Onun sözlərinə əsasən, 2010-cu ilin sonuna kimi iki yataq istehsalat prosesinə qoşula bilər.
Anglo Asian Mining PLC şirkəti Azərbaycan hökuməti ilə 1997-ci ilin avqustunda imzaladığı razılaşmaya əsasən, Azərbaycanın cənub-qərbində yerləşən 6 yataqda hasilat işləri aparmaq hüququna malikdir (Gədəbəy, Ordubad, Qoşa bulaq, Qızıl bulaq, Vəncəli və Söyüdlü).
Müqaviləyə əsasən, yataqlarda təxminən 400 min ton qızıl, 2500 ton gümüş və 1,5 milyon ton misin hasil edilməsi planlaşdırılır.
2015-ci ilə kimi ümumilikdə Gədəbəy yatağında 300 min unsiyadan çox qızıl hasil edilməsi planlaşdırılır.
Məqalə müəllifi ilə əlaqə ünvanı: [email protected]
