Azərbaycan, Bakı, 15 oktyabr / Trend , müxbir Ü.İsmayılova /
Azərbaycanın Sığortaçılar Assosiasiyası cümə axşamı keçirilən iclas zamanı 2009-2010-cu il üzrə fəaliyyət planını təsdiqləyib.
Fəaliyyət planına əsasən, ASA-nın əsas məqsədi dövlət sığorta nəzarəti və sığortaçılar arasında əsas vasitəçi statusunun alınması olacaq.
ASA-nın gələcək il üçün əsas vəzifələri arasında aşağıdakılar sadalanıb:
normativ-hüquqi aktların və sığorta sahəsində qanunların işlənib hazırlanması prosesində iştirak etmək üçün sığortaçılar və sığorta nəzarəti arasında informasiya və fikir mübadiləsi mexanizmlərinin yaradılması;
qanunvericilik aktlarının tətbiqi üçün qarşılıqlı mexanizmlərin yaradılması və sığortaçılar və sığorta nəzarəti arasında mübahisəli problemlərin həll edilməsi;
əhali arasında və biznesdə sığorta mədəniyyətinin inkişafı sahəsində fəaliyyət mexanizminin işlənib hazırlanması, həmçinin onun təbliği;
ASA komitələrinin işinin maksimum səmərəliliyinə nail olmaq;
ASA komitələri tərəfindən qəbul edilən qərarların iştirakçılar tərəfindən dərhal yerinə yetirilməsini nəzərdə tutan sistemin hazırlanması və tətbiqi.
İclas zamanı Azərbaycanın Sığortaçılar Assosiasiyasının yeni sədri vəzifəsinə cümə axşamı Atəşgah sığorta şirkətinin idarə heyətinin sədri Azər Əliyev seçilib. O, bu vəzifədə MBASK şirkətinin başçısı olan Cəmil Məlikovu əvəz edib.
Azərbaycanın Sığortaçılar Assosiasiyasının müşahidə şurasına Azərbaycanın beş sığorta şirkəti daxildir (MBASK, Standard Insurance, Beynəlxalq Sığorta şirkəti, Azersigorta, Ateshgah). Müşahidə şurasının hər beş üzvündən biri nizamnaməyə əsasən, ardıcıl olaraq bir il müddətinə Assosiasiyaya sədrlik edir.
Azərbaycanın Sığortaçılar Assosiasiyası 2006-cı ilin dekabrında təsis edilib.
Azərbaycanda 28 sığorta və bir təkrar sığorta şirkəti fəaliyyət göstərir. Onların hər biri ASA-nın üzvüdür.
Məqalə müəllifi ilə əlaqə ünvanı: [email protected]