Azərbaycan, Bakı, 16 noyabr / Trend , müxbir N.İsmayılova/
İstehlak mallarının qiyməti və xidmət tarifləri oktyabrda 2009-cu ilin sentyabr ayı ilə müqayisədə 0,4 faiz, ötən ilin yanvar-oktyabr ayları ilə müqayisədə isə on ay ərzində 1,7 faiz artıb. Bu barədə bazar ertəsi Dövlət Statistika Komitəsindən bildirilib.
Ərzaq məhsullarının qiyməti oktyabrda 0,2 faiz, qeyri-ərzaq mallarının qiyməti 0,7 faiz, xidmət tarifləri isə 0,3 faiz artıb.
2008-ci ilin yanvar-oktyabr ayı ilə müqayisədə ərzaq məhsullarının qiyməti bir faiz azalıb, qeyri-ərzaq mallarının qiyməti dörd faiz, xidmət sahəsində tariflər isə 6,6 faiz artıb.
Oktyabrda mövsümi dəyişikliyə məruz qalan (meyvə və tərəvəz) məhsul və xidmətlər çıxılmaqla, istehlak qiymətlərinin baza indeksi və dövlət tərəfindən tənzimlənən qiymətlər ötən ayla müqayisədə 100,7 faiz təşkil edib, ötən ilin müvafiq dövrü ilə müqayisədə isə doqquz ay ərzində 102,1 faiz təşkil edib.
Məqalə müəllifi ilə əlaqə ünvanı: [email protected]