Azərbaycan, Bakı, 17 mart / Trend , müxbir N.İsmayılova/
Qiymətli Kağızlar üzrə Dövlət Komitəsi (QKDK) Azərbaycan bankı DekaBankın 12,439 milyon manat həcmində olan sadə, sənədsiz, adlı səhmlərinin emissiyasını qeydiyyata alıb. Bu barədə QKDK-nın çərşənbə günü yaydığı məlumatda bildirilir.
Nominal dəyəri 259,3 manat olan 47 970 ədəd səhmin yerləşdirilməsi 200 manat nominalında həmin sayda səhmin konvertasiyası yolu ilə keçiriləcək. Beləliklə, bankın nizamnamə kapitalı hazırkı 9,594 milyon manat həcmdən 12,439 milyon manata kimi artırılacaq.
2009-cu ilin yekunları üzrə DekaBankın aktivləri 32,43 milyon manat, kredit portfeli 25,7 milyon manat, depozit portfeli 8,015 milyon manat təşkil edib. Bankın 2009-cu il üzrə mənfəəti 2,844 milyon manat olub. Bankın məcmu kapitalı 12,78 milyon manat təşkil edib.
Martın 17-nə olan cari məzənnə 0,8033 AZN/USD təşkil edir.
