Türkmənistan, Aşqabat, 26 mart / Trend , H.Həsənov/
Türkmənistan Prezidenti Qurbanqulu Berdımuhəmmədov ölkənin metallurgiya sənayesinin inkişafı məqsədilə fərman imzalayıb. Sözügedən fərman bu yaxınlarda Aşqabadın şəhərətrafı qəsəbəsi Ovadandepedə açılan metallurgiya zavodu vasitəsilə ölkənin fasiləsiz olaraq xammalla təmin olunmasını nəzərdə tutur.
Prezidentin fərmanına əsasən, metal qırıntılarının, qara və əlvan metalların saxlanılması və təhvil verilməsi qaydaları təsdiq olunub.
Ovadandepedə ildə 160 min ton istehsal gücünə malik olan müəssisə Türkiyə şirkətləri konsorsiumu tərəfindən inşa edilib. Zavod armatur, şveller buraxır ki, bu da analoji məhsulların idxalının azalmasına imkan verir.
Müəssisə özündə poladtökmə, armatur-prokat və profil-prokat sexlərini birləşdirir, onlar müasir, yüksək texnoloji elektron avadanlıqları ilə təchiz olunub.
Sonuncu sənədlə nazirliklərə, sahə idarələrinə, rayon administrasiyalarına və onların tabeliyində olan idarələrə, müəssisələrə, təşkilatlara müəyyən edilmiş qaydada istifadəyəyararsız avadanlıq, nəqliyyat, mexanizmlər, özündə metal qırıntıları, qara və əlvan metal tullantılarını birləşdirən digər metallurgiya vasitələrini hesabdan silməyə icazə verilib.
Prezidentin fərmanına əsasən, yuxarıda qeyd olunan bütün müəssisələr hesabın aparılması, metal qırıntılarının və metal tullantılarının saxlanılması şəraitini, eyni zamanda, onların müəyyən edilmiş qaydada təhvil verilməsini təmin etməlidirlər.
Ölkənin İqtisadiyyat və İnkişaf Nazirliyinə Tikinti Materialları Sənayesi Nazirliyi ilə birgə bir ay ərzində nazirliklər, sahə idarələri və digər qurum şöbələri tərəfindən metal qırıntılarının və metal tullantılarının təhvil verilməsi üzrə dövlət planı hazırlamaq və təsdiq etmək tapşırılıb.