Azərbaycan, Bakı, 14 aprel /Trend, müxbir Ü.İsmayılova/
Azərbaycanda qiymətləndiricilərin sertifikatlaşdırılmasının növbəti - üçüncü mərhələsi aprelin 21-22-də keçiriləcək. Bunu Azərbaycanın Qiymətləndiricilər Cəmiyyətinin əlaqələndiricisi Amil İsmayılov çərşənbə günü deyib.
"Sertifikatlaşdırma iştirakçıları üçün kurslar təxminən aprelin 19-da keçiriləcək", - İsmayılov deyib.
Onun sözlərinə görə, Qiymətləndiricilər Cəmiyyəti imtahanda iştirak etmək barədə Beynəlxalq Maliyyə Korporasiyası (BMK), Rusiya Qiymətləndiricilər Cəmiyyəti (RQC) və İsveçrənin İqtisadi Əlaqələr üzrə Dövlət Katibliyinin (SECO) ekspertləri tərəfindən təsdiq alıb.
İsmayılovun sözlərinə görə, kurslarda 22 qiymətləndirici iştirak edəcək, onlardan təxminən 10-u imtanandan keçəcək.
İmtahan sertifikatlaşdırmanın birinci və ikinci proseslərində sertifikatlaşdırılmış yeddi qiymətləndirici tərəfindən aparılacaq.
Azərbaycanda qiymətləndiricilərin sertifikatlaşdırılmasının birinci mərhələsi 2009-cu ilin mart ayında olub və birinci mərhələdən üç qiymətləndirici keçib. Həmin ilin iyun ayında baş tutan ikinci mərhələdə isə dörd qiymətləndirici sertifikatlaşdırmadan keçib.
Respublikada qiymətləndiricilərin sertifikatlaşdırılması Beynəlxalq Maliyyə Korporasiyasının təşəbbüsü ilə Azərbaycanda və Mərkəzi Asiyada ipotekanın ilkin inkişafı layihəsi çərçivəsində həyata keçirilir.
Azərbaycanda qiymət fəaliyyəti 1995-ci ildə qəbul edilmiş "Qiymət fəaliyyəti" haqqında qanunla nizamlanır.
