Azərbaycan, Bakı, 10 avqust /Trend, müxbir İ.Xəlilova/
Asiya İnkişaf Bankı (AİB) Azərbaycana beşillik fasilədən sonra Direktorlar Şurasının nümayəndə heyətini göndərir. Bankın Bakı nümayəndəliyindən bildirdiklərinə görə, sentyabrın 23-16-da direktorların səfəri gözlənilir. Onlar son dəfə Azərbaycanda 2005-ci ildə olublar.
"Səfər əməkdaşlığın indiki vəziyyəti ilə tanışlıq və əlaqələrin gələcək inkişaf perspektivlərinin müzakirəsi məqsədilə baş tutacaq", - nümayəndəlikdən deyiblər.
Hələ may ayında, AİB-in Direktorlar Şurasının 43-cü illik iclasında, bankın prezidenti Haruhiko Kuroda Azərbaycanla əlaqələri genişləndirməyə hazır olduğunu bildirib. Buna sübut kimi, hazırda AİB Azərbaycan üçün nəqliyyat və su təchizatı sahələrində investisiya layihələrinin həyata keçirilməsinə müvafiq olaraq, 500 və 600 milyon dollar məbləğində iki multitranş kredit ayırıb.
Azərbaycan da AİB-lə infrastrukturun genişləndirilməsi sahəsində əməkdaşlığa böyük əhəmiyyət verir. "Biz bankın maliyyə resurslarını Azərbaycan Prezidenti tərəfindən ötən il təsdiqlənən "Regionların sosial-iqtisadi inkişafı üzrə Dövlət Proqramı"na (2009-2013-cü illər) cəlb edilməsində maraqlıyıq", - bundan əvvəl ölkənin bankda alternativ idarəedicisi olan Azərbaycanın maliyyə naziri Samir Şərifov bildirib.
2007-ci ilin sentyabrınadək AİB-in dövlət zəmanəti altında maliyyələşdirdiyi layihələrin ümumi portfeli 104 mln dollar təşkil edib. Azərbaycanın AİB-lə əməkdaşlığa başladığı vaxtdan - 1999-cu ildən üç layihə maliyyələşdirilib. Lakin nəqliyyat layihələrinin maliyyələşdirilməsi üçün ümumi dəyəri 500 mln dollar olan "Multitranche Financing Facility" (MFF) mexanizmi və enerji layihəsinin təsdiqlənməsi nəticəsində, portfel 519,4 mln dollaradək artıb.
"Asiya" bankı dövlət zəmanəti altında maliyyələşdirmə həcminin artırılması ilə yanaşı, Azərbaycanın bank sektorunun birbaşa maliyyələşdirilməsi üzrə əsas oyunçuya çevrilməyə başlayıb. Bu gün AİB Azərbaycan bankları üçün 56 mln dollar məbləğində kredit xətlərini təsdiq edib. Asiya İnkişaf Bankı hələ 2007-ci ilin yayında Azərbaycanın bank sektoru üzrə portfelin genişləndirilməsi və 120 mln dollara çatdırılmasını elan etsə də, dünya maliyyə böhranının güclənməsi nəticəsində, bank bütün bəyan edilmiş həcmi mənisməyə bilməyib.
AİB 1966-cı ildə təsis edilib və 67 üzvü var. Onun mənzil-qərargahı Filippinin paytaxtı Manilada yerləşir. Azərbaycan Asiya Bankının üzvlüyünə 1999-cu il dekabrın 22-də qəbul edilib və onun bankın kapitalında iştirak payı 0,5 faizdir.
AİB-in aparıcı səhmdarları Yaponiya və ABŞ (ümumi səhmdar kapitalın 31,2 faizi), Hindistan və Çin (12,8 faiz), Avstraliya, Cənubi Koreya, Kanada (16 faiz) və başqalarıdır.