Azərbaycan, Bakı, 14 avqust /Trend, müxbir N.İsmayılova/
İyulda qeyri-bank təşkilatı "TBC Kredit"in kredit portfelinin həcmi 1,1 faiz artaraq 18,4 milyon dollara çatıb. Bu barədə təşkilatdan bildiriblər.
"Kredit portfelinin ümumi həcmində biznes-kreditin payına 57, ipoteka kreditinin payına 28, istehlak kreditinin 15 faiz düşür", - "TBC Kredit"dən deyiblər.
Təşkilatın aktiv kreditlərinin sayı 1727 təşkil edir.
İlin əvvəlindən şirkət öz müştərilərinə kredit üzrə ötən illə müqayisədə daha əlverişli şərtlər təqdim edərək, məbləğ və kreditləşmə müddətini artırıb. Xüsusi tələbat bütün məqsədlərə ayrılan rüsumsuz istehlak kreditidir (səyahət, toyların təşkili, mebel və texnikanın alışı və s.). Bu kreditin maksimal məbləği 18 ayadək olmaqla 5 min manat təşkil edir.
İyunun 1-dən "TBC Kredit" faiz dərəcəsini azaldaraq, ipoteka kreditləri üzrə şərtləri yaxşılaşdırıb. Bununla da illik faiz dərəcəsi 10 illik kredit müddətinə 18 faiz olub. Əhaliyə mənzillərin, torpaq sahəsinin alınmasına, təmiriə, özəl evlərin tikintisinə kreditlər verilir. Bununla belə, kreditin maksimal məbləği 200 min dollar təşkil edir.
Kredit portfelinin çox hissəsini biznes-kreditlər təşkil edir. İlin əvvəlində bu məhsul üzrə faiz dərəcəsi azaldılıb və orta hesabla illik 22 faiz təşkil edib. Biznes-kreditlər üzrə maksimal məbləğ 500 min manata çatır.
Biznes-portfelə kiçik müəssisələrə ötən ilin sonundan girovsuz verilən mikrobiznes kreditləri daxildir. Mikrobiznes kreditlərinin girovsuz maksimal məbləği 10 min manatadək artırılıb.
"TBC Kredit" qeyri-bank kredit təşkilatı Azərbaycanda 1999-cu ildən fəaliyyət göstərir. 2007-ci ilin dekabrından şirkətin 75 faizi Gürcüstanın aparıcı bankı "TBC Bank"a, 25 faizi isə "ShoreBank International Ltd" şirkətinə məxsusdur.
Avqustun 14-nə rəsmi məzənnə 0,8037 AZN/USD təşkil edir.
