...

Azərbaycanın İpoteka Fondunun agent banklarının siyahısı genişlənir

Biznes və iqtisadiyyat xəbərləri Materials 23 Sentyabr 2010 10:26 (UTC +04:00)

Azərbaycan, Bakı, 23 sentyabr /Trend, müxbir N.İsmayılova/

Azərbaycanda fəaliyyət göstərən "KredoBank" Mərkəzi Bank yanında Azərbaycanın İpoteka Fondunun (AİF) 20-ci agent bankı olub. Bu barədə çərşənbə günü bankdan məlumat verilib.

"Bank İpoteka Fondunun agent bankı olub və bir həftə əvvəl ipoteka kreditlərinin verilməsi üzrə ərizələri qəbul etməyə başlayıb", - bankdan bildiriblər.

Bu gün banka artıq bir ərizə daxil olub. "KredoBank" mənzilin alınmasını AİF-in vəsaiti hesabına maliyyələşdirməyi planlaşdırır. Hələlik bankın öz ipoteka proqramı yoxdur.

AİF-in agenti olan sonuncu bank "AFB Bank" olub. Hazırda 16 sığorta və 10 qiymətləndirmə şirkəti AİF-in agentləridir.

Ölkədə ipoteka kreditləşməsi AİF-in standartları üzrə 2006-cı il martın 25-də başlayıb və 2007-ci ilin yayında vəsait çatışmazlığı ucbatından dayandırılıb. O, 2009-cu il iyunun 1-dən bərpa edilib.

AİF-in şərtlərinə görə, Azərbaycanda adi ipotekanın maksimum verilmə həddi 50 min manat təşkil edir və səkkiz faiz dərəcə ilə 25 il müddətinə verilir. Sosial ipoteka 35 min manat təşkil edir və dörd faiz dərəcə ilə 30 il müddətinə verilir. Adi və güzəştli kreditlər üçün ilkin ödəniş 15 faizdir.

Səkkiz ay ərzində ölkənin Mərkəzi Bankı nəzdində fəaliyyət göstərən Azərbaycan İpoteka Fondunun (AİF) xətti ilə 67,5 milyon manatdan çox məbləğdə kredit verilib. Bu barədə çərşənbə axşamı AİF-dən bildirilib.

Kreditlər milli valyutada - manatla və yalnız Azərbaycan vətəndaşlarına verilir; ipotekanın predmeti yalnız mənzil və şəxsi evlər ola bilər. İpoteka kreditinin məbləği ipoteka üçün girov qoyulan daşınmaz əmlakın bazar qiymətinin 85 faizini ötməməlidir; kreditə görə aylıq ödəniş borcalanın aylıq gəlirinin 70 faizini keçməməlidir.

Güzəştli şərtlər şəhid, milli qəhrəmanlar və məcburi köçkün ailələrinin üzvlərinə, ən azı, üç il iş təcrübəsi olan dövlət qulluqçularına, elmlər namizədləri və doktorluq dərəcəsi olanlara, idman sahəsində xüsusi xidmətləri olan şəxslərə, həmçinin, maksimum üç il xidmət stajı olan hərbçilərə şamil edilir.

Güzəştli ipoteka krediti alan hər ailə bundan yalnız bir dəfə istifadə edə bilər.

"KredoBank" 1994-cü il fevralın 28-də "Anar" kommersiya bankı adı altında açılıb. Bu gün bank 9 filiala malikdir, onlardan 4-ü Bakı şəhərində yerləşir.

Sentyabrın 22-nə rəsmi məzənnə 0,803 AZN/USD təşkil edib.

Xəbər lenti

Xəbər lenti