Azərbaycan, Bakı, 24 sentyabr /Trend, müxbir N.İsmayılova/
Azərbaycanın "Turanbank"ı innovativ metodlardan istifadə edərək, yeni istehlak kreditləri təqdim edib. Bu barədə bankdan verilən məlumatda deyilir. Yeni metoda əsasən, kreditin güzəşt müddəti və annuitet üzrə ödənilmə şərtlərinə yeniliklər edilib.
İstehlak kredit kartlarını əldə etmiş müştərilər 2 ay güzəşt müddəti əldə edirlər; belə ki, I ay əldə olunmuş məbləğə heç bir faiz ödənilmir, II ay yalnız istifadə edilmiş məbləğə hesablanmış faiz, III aydan etibarən isə hesablanmış faiz və əsas məbləğin 10%-i ödənilir. Eyni zamanda, əsas məbləğin 10%-dən çoxu ödənilərsə, həmin məbləğ müştəri tərəfindən yenidən həmin güzəşt şərtləri ilə istifadə oluna bilər.
Sentyabrın 1-nə olan nəticələrə görə, bankın ümumi kapitalı 21,6 milyon manat, nizamnamə kapitalı 18,5 milyon manat təşkil edir. "Turanbank"ın aktivləri 130,4 milyon manat, kredit portfeli 93 milyon manat təşkil edir.
Bankın 25 səhmdarı var ki, onların 5-i - hüquqi şəxs (21,8 faiz) və 20-si fiziki şəxsdir (78,2 faiz). Bu gün ölkədə bankın 11 filialı və 21 valyuta mübadiləsi məntəqəsi fəaliyyət göstərir.
