Azərbaycan, Bakı, 14 oktyabr /Trend/
Dəniz nəqliyyatında Ticarət Birliyi Azərbaycan Dövlət Xəzər Dəniz Gəmiçiliyinin (KASPAR) tərkibinə daxil olacaq. Bu barədə cümə axşamı "Azərbaycan" qəzetində yerləşdirilmiş məlumatda deyilir.
Məlumatda deyildiyi kimi, KASPAR-ın bu il avqustun 1-dəki sərəncamına görə, ticarət birliyinin hüquqi şəxs statusu oktyabrın 31-dən ləğv olunur və bu struktur KASPAR-a birləşdirilir.
Kreditorlar və debitorlar iki ay ərzində KASPAR-a müraciət edə bilərlər.
Hazırda gəmiçiliyin balansında 80 gəmi - 43 tanker və 37 yük gəmisi və bərə var. Bütün gəmilərin ümumi detveyti 486 min tondan artıq təşkil edir.
Ümumilikdə, 2009-cu ildə idarə tərəfindən müxtəlif təyinatlı 13,2 milyon tona yaxın yük daşınıb. Gəmiçiliyin daşıdığı yüklərin ümumi həcmindən 9,86 milyon ton tankerlərlə, 1,03 milyon tona yaxını quru yük gəmiləri ilə, 2,3 milyon tona yaxını bərələrlə daşınıb.