Azərbaycan, Bakı, 21 oktyabr /Trend, müxbir N.İsmayılova/
Azərbaycanın bank bazarı yüksək şəffaflığa malikdir. Bu barədə cümə axşamı Azərbaycan Beynəlxalq Bankının (ABB) İdarə Heyətinin sədri Cahangir Hacıyev "Standard & Poor's"in Azərbaycan banklarının şəffaflığı ilə bağlı araşdırmasının nəticələrini şərh edərkən deyib. Nəticələr bu gün Bakıda açıqlanıb.
"Azərbaycan bankları hər il beynəlxalq auditdən keçirlər. Bu, onların fəaliyyətinin yüksək şəffaflığından xəbər verir. Azərbaycan Beynəlxalq Bankına gəldikdə, onun auditi yarım ildə bir dəfə keçirilir", - Hacıyev qeyd edib.
Onun sözlərinə görə, bundan başqa, Azərbaycan banklarının səhmlərinin alış-satışı Bakı Fond Birjasında aparılır, buna görə də xarici investorlar onları maraqlandıran yerli bankların buraxdığı qiymətli kağızları sərbəst şəkildə ala bilərlər.
Beynəlxalq Valyuta Fondunun (BVF) dəstəyi ilə "Standard & Poor's"in korporativ idarəetmə reytinqlər xidməti "Azərbaycan banklarının informasiya şəffaflığının tədqiqatı: aşağı nizamlayıcı intizam informasiyanın üstünün açılması sahəsində irəliləyişə mane olur" adlı ilk araşdırmasını təqdim edib. Tədqiqatda "Standard & Poor's"in informasiya şəffaflığı indeksində 30 böyük bank üzrə orta bal 30 faiz təşkil edib.
"Bu, MDB regionunun analoji bankları ilə müqayisədə çox aşağı səviyyədir. Məsələn, analoji tədqiqatın məlumatına görə, 2010-cu ildə Ukraynanın 30 böyük bankı üzrə informasiya şəffaflığı indeksi 43 faiz, 2007-ci ildə Rusiyanın 30 böyük bankı üzrə orta bal isə 52 faiz təşkil edib", - xidmət rəhbəri Svetlana Borodina təqdimat zamanı deyib.
Azərbaycan banklarının nisbətən zəif balları əsasən veb-saytlarda informasiyanın zəif açılması, illik hesabatların demək olar tamamilə olmaması və rəsmi hesablamalara aşağı tələblə bağlıdır.
Bundan başqa, informasiyanın ingilis dilində açılması məhduddur, bu, balları müəyyən edərkən kriteriyalardan biridir.
"Standard & Poor's"in fikrincə, 30 böyük Azərbaycan bankı arasında şəffaflığın daha yüksək göstəricisini "AccessBank", "MuğanBank", "AmrahBank", "RabitəBank" və "DəmirBank" nümayiş etdiriblər. Onlardan hər biri 40 faizdən çox bal alıb. "Standard & Poor's"in nəzərincə, daha şəffaf bank "AccessBank"dır.
Təhlil onu da göstərdi ki, əmlak strukturu haqqında informasiya bir qayda olaraq digər komponentlərə nisbətdə daha böyük həcmdə açılır. Bu komponent üzrə orta bal 48 faiz təşkil edir. Maliyyə informasiyasının açılması təhlilin əsas komponentləri arasında ikinci yeri tutur. Orta bal 36 faiz təşkil edir. Əməliyyat fəaliyyəti və idarəetmə orqanlarının iş prosesi haqqında informasiyanın açılmasının aşağı səviyyəsi qeyd olunur.