...

AİB-in Azərbaycandakı nümayəndəliyinin yeni rəhbəri vəzifəsinin icrasına başlayır

Biznes və iqtisadiyyat xəbərləri Materials 18 Noyabr 2010 13:57 (UTC +04:00)

Azərbaycan, Bakı, 18 noyabr /Trend, müxbir İ.Xəlilova/

Cümə axşamı Bakıya Asiya İnkişaf Bankının (AİB) Azərbaycandakı nümayəndəliyinin yeni rəhbəri Olli Norojono gəlir. Onun namizədliyi ölkə hökuməti tərəfindən oktyabrın sonunda bəyənilib. Bu barədə cümə axşamı bankın Bakı nümayəndəliyindən bildiriblər.

"Sabahdan etibarən Norojono bankın Azərbaycandakı nümayəndəliyinin rəhbəri vəzifəsinin icrasına başlayır", - bankdan deyiblər.

Norojono Azərbaycanda dekabrın ortalarınadək olacaq, ölkəyə gələn ilin əvvəlində isə birdəfəlik köçəcək.

O, bundan əvvəl AİB-də Mərkəzi və Qərbi Asiya regionu üzrə nəqliyyat sahəsində baş iqtisadçı vəzifəsini tutub.

2006-cı ilin oktyabrından AİB-in Azərbaycandakı nümayəndəliyi rəhbərsiz qalıb.

2007-ci ilin sentyabrınadək Asiya bankının dövlət zəmanətləri altında maliyyələşdirdiyi layihələrin ümumi portfeli 104 milyon dollar təşkil edib. AİB 1999-cu ildən Azərbaycan hökuməti ilə əməkdaşlığa başladıqdan bəri üç layihə maliyyələşdirib. Lakin nəqliyyat layihələrinin maliyyələşdirilməsi məqsədi ilə "Multitranche Financing Facility" (MFF) mexanizminin təsdiqlənməsi nəticəsində portfel 304 milyon dollaradək artıb. Eləcə də bank 2008-ci ildə enerji layihəsinə 160 milyon dollar və yol layihəsinə 55,4 milyon dollar olmaqla iki kreditin verilməsi haqda qərar qəbul edib. Nəticədə AİB-in Azərbaycan üzrə 519,4 milyon dollar həcmində ümumi portfeli formalaşıb. Su sektoru üçün kreditin təsdiqlənməsindən sonra o, 964,4 milyon dollar həcmində olub.

Dövlət zəmanəti altında maliyyələşmənin həcmini artması ilə yanaşı Asiya bankı Azərbaycanın bank sektorunun birbaşa maliyyələşdirilməsi üzrə əsas tərəfdaşa çevrilib.

Bu gün Asiya bankı tərəfindən Azərbaycan bankları üçün 56 milyon dollar həcmində kredit xətti təsdiqlənib. Lakin ölkənin bank sektorunun portfelinin 120 milyon dollaradək genişləndirilməsi üzrə planlar dünyadakı iqtisadi proseslərlə bağlı hələ də ləngiyir.

Xəbər lenti

Xəbər lenti