Azərbaycan, Bakı, 7 dekabr /Trend, müxbir İ.Xəlilova/
"ABB-Moskva" MMC 2015-ci ilədək aktivlərini 3,5 milyard rublluq kapitalla 50 milyard rubladək çatdırmağı planlaşdırır. Bu barədə Trend-ə bankın idarə heyətinin sədri Fuad Abdullayev məlumat verib.
"Belə proqnozlar ümumilikdə Azərbaycan Beynəlxalq Bankı qrupunun strateji inkişafı çərçivəsində "PriceWaterhouseCoopers"in yardımı ilə işləyib hazırlanmış bankın 2010-2015-ci illərdəki yeni strategiyasında verilib", - Abdullayev bildirib.
Biznes-plan üzrə göstəricilərə nail olmaq üçün "ABB-Moskva"nın orta illik artım göstəricisi 20-25 faiz, minimum artım isə 10 faiz səviyyəsində qoyulub. Orta hesabla Rusiyanın bank bazarı 28 faiz üzrə artır.
2010-cu ilin yanvar-sentyabr aylarının yekunları üzrə "ABB-Moskva"nın aktivləri 20 faiz artıb, depozit bazası isə 25 faiz olub ki, bu da əsasən fərdi əmanətçilərin hesabına təmin olunub.
"Bu, banka inamın daha artmasından xəbər verir və ilin yekunları üzrə bankın aktivlərinin həcmi 30-35 faiz artaraq 18 milyard rubladək arta bilər, - Abdullayev deyib. - 2015-ci ilədək "ABB-Moskva" Rusiyanın 100 ən iri bankı siyahısına daxil olmalıdır".
Onun sözlərinə görə, bank özünün strateji siyasətini tamamilə dəyişib və daha çox kiçik və orta biznes seqmentinə, fərdi sahibkarlarla işə, korporativ xırda satışa və Azərbaycan diasporu ilə işə istiqamətlənəcək.
"Moskva bankı açılarkən onun strategiyası xarici iqtisadi və ticari əməliyyatlara yönəlmişdi, - Abdullayev bildirib. - Lakin yeni siyasətimizdə riteyl seqmentinə gedəcək, öz regional ofislərimizi, artıq olduğumuz şəhərlərdəki ofislərimizi genişləndirəcəyik. Bu istiqamətin hesabına bankı inkişaf etdirəcək və göstəriciləri artıracağıq".
Onun sözlərinə görə, bankın strategiyası qarşıdakı beş ildə tam dəyişəcək və yaxın il yarım, iki il ərzində bank başqa istiqamətə dönməlidir.
"ABB-Moskva"nın strategiyası üçün bankın təşkilati strukturundan başlamış xidmətlər, eləcə də kiçik və orta biznesin inkişafı, korporativ xırda satış və fərdi sahibkarlarla işlə tamamlanan 15-ə yaxın strateji təşəbbüs müəyyən edilib.
"ABB-Moskva" Azərbaycan Beynəlxalq Bankının törəmə strukturudur, Rusiya ərazisində öz fəaliyyətini həyata keçirən yüz faizlik Azərbaycan kapitalı ilə birinci və yeganə bankdır. Bu gün bankın Moskvada, Sankt-Peterburqda və Yekaterinburqda 12 ofis və filialı var.
