Azərbaycan, Bakı, 14 dekabr /Trend, müxbir N. İsmayılova/
2010-cu ilin 7-10 dekabr tarixlərində Avropa Şurasının Pulların Yuyulması və Terrorçuluğun Maliyyələşdirilməsinə Qarşı Tədbirlərin Qiymətləndirilməsi üzrə Ekspertlər Komitəsi (MONEYVAL) 34-cü plenar iclasını keçirib. İclas çərçivəsində Azərbaycan ilk dəfə qiymətləndirici ölkə rolunda çıxış edib. Bu barədə Azərbaycan Mərkəzi Bankı yanında Maliyyə Monitorinqi Xidmətinin çərşənbə axşamı yaydığı məlumatda deyilir.
Tədbirdə Azərbaycanı "çirkli" pulların yuyulması üzrə idarələrarası işçi qrupun rəhbərliyi, Qiymətli Kağızlar üzrə Dövlət Komitəsinin sədri Rüfət Aslanlı və Maliyyə Monitorinqi Xidmətinin rəhbərliyi təmsil edib.
Gündəliyə uyğun olaraq, iclas çərçivəsində 30-dan artıq məsələyə, eləcə də İqtisadi Əməkdaşlıq və İnkişaf Təşkilatının Maliyyə Tədbirləri üzrə İşçi Qrupunun (FATF) Beynəlxalq Əməkdaşlığın Qiymətləndirilməsi Alt Qrupunun (ICRG) növbəti təşəbbüsünün implementasiyası, bəzi ölkələrin "xüsusi monitorinq" rejiminə cəlb edilməsi, həmçinin PL/TMM (Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə) sahəsində üzv ölkələrin hesabatlarına baxılıb.
Azərbaycan tərəfindən Moldovanın PL/TMM sahəsində fəaliyyətinə dair ikinci tərəqqi hesabatı analiz olunub və Azərbaycan tərəfi MONEYVAL katibliyi ilə birgə rəylə çıxış edib. Azərbaycanın rəyləri MONEYVAL katibliyi tərəfindən qənaətbəxş qiymətləndirilib.
Plenar iclas çərçivəsində Malta, Lixtenşteyn və Andorranın da ikinci tərəqqi hesabatlarına, Serbiyanın birinci tərəqqi hesabatına baxılıb və qəbul edilib. Həmçinin Albaniya, Bosniya və Hersoqovinaya onların təqdim etdikləri hesabatlar qəbul olunmadığına görə yeni hesabatın hazırlanması üçün 2011-ci ilin aprelinədək vaxt verilib.
Eləcə də, Ukrayna, Xorvatiya və Makedoniyada "xüsusi monitornq rejiminin" tətbiqinə ehtiyac olmaması ilə bağlı qərar qəbul edilib.
MONEYVAL-ın növbəti iclası 2011-ci il aprelin 11-15-də keçiriləcək.
Azərbaycanın PL/TMM sisteminin inkişafı sahəsində qəbul etdiyi ölçülər 2010-cu ilin iyununda FATF-ın növbəti plenar iclasında yüksək qiymətləndirilib və oktyabrda Azərbaycan FATF-ın "xüsusi diqqət tələb edən" ölkələr siyahısından çıxarılıb.