Azərbaycan, Bakı, 10 yanvar /Trend, müxbir Ü.İsmayılova/
Azərbaycanın sığorta bazarında yeni icbari xidmət növlərinin tətbiqi ilk növbədə ölkə əhalisi arasında məlumatlandırmanın artmasına səbəb olacaq. "Günay Sığorta" şirkətinin idarə heyəti sədrinin səlahiyyətlərini yerinə yetirən Vüqar Rəcəbov bu fikirdədir.
Azərbaycanda "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında" qanun qüvvəyə minib, eləcə də 2011-ci ilin martınadək ölkədə şirkətlərin Life və Non-Life sığortası üzrə portfelləri bölüşdürülməlidir. Bu günə ölkədə həyat sığortası üzrə iki şirkət - "Atəşgah Həyat" və "Qala Həyat" fəaliyyət göstərir. Yaxın vaxtlarda "Paşa Holdinq" qrupuna daxil olan "Paşa Həyat" şirkətinin lisenziyalaşdırılması gözlənilir.
Rəcəbovun fikrincə, çoxillik təcrübəyə əsasən, sığortanın icbari növləri yerli işəgötürənlər arasında fəal surətdə tətbiq ediləcək və sığorta hallarına görə vaxtında ediləcək ödəniş bütün işçilər arasında yayılacaq.
"Sığorta xidmətlərinin icbari növləri əhali arasında məlumatlılığın və sığortaya olan inamın 70-80 faiz artımına səbəb olacaq", - Rəcəbov hesab edir.
Onun fikrincə, ölkə əhalisində insanların haqlar ödəyərək sığorta ödənişləri almadıqları sovet dönəmindəki sığorta haqqında yanlış təsəvvür formalaşıb.
Azərbaycanda həyat sığortasının fəallaşmasına toxunan Rəcəbov qeyd edib ki, bu, ölkənin sığorta bazarının, xüsusilə də həyat sığortası bazarının inkişafı üçün növbəti stimullaşdırıcı addımdır. Hazırda həyat sığortasının ölkənin sığorta bazarının ümumi sığorta portfelində payı bir faizi ötmür.
Azərbaycanın sığorta bazarında 27 sığorta və bir təkrar sığorta şirkəti fəaliyyət göstərir. 2010-cu ilin yanvar-noyabr ayları ərzində bütün sığortaçıların sığorta haqlarının ümumi həcmi 45,48 milyon manat ödənişlə 139,82 milyon manat təşkil edib.
Yanvarın 10-na olan rəsmi məzənnə 0,7976 AZN/USD təşkil edir.
