Azərbaycan, Bakı, 23 fevral /Trend, müxbir A.Axundov/
"Azərbaycan Hava Yolları" QSC Novruz bayramına qədər (20 mart) Türkiyənin İzmir şəhərinə sınaq uçuşlarına başlayacaq. Bu barədə Azərbaycanın İstanbuldakı konsulu Pərviz Məmmədzadə bildirib. Trend-in məlumatına görə, xəbəri çərşənbə günü Türkiyənin "Hürriyyət" qəzeti yayıb.
"İzmirə sınaq uçuşları Novruz bayramınadək başlayacaq, ondan sonra yaxın vaxtlarda müntəzəm reyslərə başlanacaq", - Məmmədzadə deyib.
Bir az əvvəl "Azərbaycan Hava Yolları" QSC məlumat vermişdi ki, bu il martın 18-də Bakı - İzmir-Bakı marşrutu üzrə yeni J2041/042 müntəzəm aviareysi açılacaq.
Reys bazar ertəsi və cümə günləri "Airbus-320" təyyarələri ilə həyata keçiriləcək. Təyyarə Bakıdan 10:55-də uçacaq və İzmirə 11:55-də çatacaq (yerli vaxtla). İzmirdən təyyarə 12:55-də çıxacaq, paytaxta isə Bakı vaxtı ilə 17:35-də gələcək.
Birtərəfli biletin qiyməti 166 avro, gediş-gəliş üçün isə 272 avrodur.
Fevralın 23-ə rəsmi məzənnə 1,0877 AZN/EUR təşkil edir.