Azərbaycan, Bakı, 3 mart /Trend, müxbir A.Bədəlov/
Azərbaycanın Kənd Təsərrüfatı Nazirliyi ölkə Parlamentinə "Kooperasiya haqqında" qanun layihəsini təqdim edib. Bu barədə çərşənbə günü kənd təsərrüfatı nazirinin müavini Bəhram Əliyev məlumat verib.
"Bu layihəyə yaxın gələcəkdə baxılacağı gözlənilir", - Əliyev bildirib.
Onun sözlərinə görə, Azərbaycandakı əlverişli iqlim şəraiti kənd təsərrüfatının müxtəlif sahələrinin inkişaf etdirilməsinə şərait yaradır ki, bu da öz növbəsində investisiyalaşdırma üçün imkanlar açır. Taxılçılıq kənd təsərrüfatı məhsulları sahəsində prioritetdir.
"2009-cu ildə taxıl istehsalı üç milyon ton təşkil edib ki, bu da bu məhsula olan tələbatı ödəyir. 2010-cu ildə əlverişsiz hava şəraiti üzündən istehsalın bu səviyyəsini əldə etmək mümkün olmayıb. İstehsal iki milyon ton təşkil edib, yerdə qalan həcmi isə idxal etmək lazım gəlib", - o, deyib.
Əliyevin sözlərinə görə, heyvandarlıq da yaxşı templərlə inkişaf edir. 2010-cu ildə Avropadan ölkəyə 715 baş cins mal-qara gətirilib. Onlar yerli iqlim şəraitinə yaxşı uyğunlaşıblar.