Azərbaycan, Bakı, 4 aprel /Trend, müxbir N.İsmayılova/
Bakının şəhərətrafı qəsəbələrinin inkişafı üzrə layihələrin maliyyələşdirilməsi Azərbaycan İqtisadi İnkişaf Nazirliyinin Sahibkarlığa Kömək Milli Fonduna (SKMF) tapşırılacaq. Bu barədə bazar ertəsi Trend-ə hökumətdəki mənbə deyib.
"SKMF Bakının şəhərətrafı qəsəbələrində layihələrin maliyyələşdirilməsinə cəlb ediləcək və bunun üçün yeni fond yaradılmayacaq. Hazırda SKMF kifayət qədər vəsaitə malikdir və əlavə maliyyələşdirilmənin ayrılması məsələsinə də baxılmır", - mənbə bildirib.
Onun sözlərinə görə, bu məqsədlə Bakının şəhərətrafı qəsəbələrini əhatə etmək üçün fondun vəsaitlərinin bölüşdürülməsi aparılacaq.
Azərbaycan Prezidenti İlham Əliyev martın 9-da Bakı və paytaxtətrafı qəsəbələrin sosial-iqtisadi inkişafı məsələləri ilə bağlı iclasda İqtisadi İnkişaf Nazirliyi yanında Sahibkarlığa Kömək Milli Fondunun fəaliyyət təcrübəsinin dəyişdirilməsi ilə bağlı tapşırıq verib. İndiyədək SKMF güzəştli kreditləri əsasən ölkə regionlarında verib.
Dövlət başçısı fondun fəaliyyətini Bakının şəhərətrafı qəsəbələrində genişləndirilməsini və ya bu qəsəbələrdə kiçik və orta sahibkarlığın güzəştli kreditləşdirilməsi üzrə xüsusi fondun yaradılmasını təklif edib. Prezident İlham Əliyev İqtisadi İnkişaf Nazirliyinə qısa müddət ərzində müvafiq təklifləri təqdim etməyi tapşırıb.
2011-ci ildə SKMF 27,3 milyon manat məbləğində 323 kredit verib. Layihələr 23,7 milyon manat məbləğində yeni texnologiyalara əsaslanan 25 iri layihənin və 3,6 milyon manat məbləğində 298 kiçik layihənin həyata keçirilməsini əhatə edib.
Ümumilikdə fond 2010-cu ildə 1430 sahibkara 115 milyon manat məbləğində güzəştli kreditlər verib. Verilmiş kreditlərin 99,8 faizi regionların payına düşür. Bu kreditlər hesabına 5 600-ə yaxın yeni iş yerinin yaradılması nəzərdə tutulur. Cari ildə fond güzəştli kreditlərin maliyyələşdirilməsinə 125 milyon manat ayırmağı planlaşdırır.
Aprelin 4-nə olan rəsmi məzənnə 0,7926 AZN/USD təşkil edir.
