Azərbaycan, Bakı, 16 aprel /Trend, müxbir A.Axundov/
Ötən ilin analoji dövrü ilə müqayisədə 2011-ci ilin birinci rübündə Azərbaycanda kənd təsərrüfatı məhsullarının istehsalı 5,3 faiz, o cümlədən bitkiçilik - 6,6 faiz, heyvandarlıq - 5,3 faiz artıb. Bu barədə Azərbaycan Dövlət Statistika Komitəsindən məlumat verilib.
Məlumata əsasən, ölkədə yaz sahə işləri sürətlə aparılır və aprelin 1-nə 110,6 min hektar sahədə yazlıq bitkilərin səpini aparılıb. 29,4 min hektar sahədə kartof, 24,8 min hektarda tərəvəz, 37,3 min hektarda çoxillik otlar, eləcə də taxıl, qarğıdalı, pambıq, bostan bitkiləri, günəbaxan, şəkər çuğunduru və s. əkilib.
2011-ci ilin birinci rübündə heyvandarlıq sahəsində iribuynuzlu mal-qaranın sayı il ərzində 1,2 faiz artaraq 2,65 milyona, qoyun və keçilərin sayı isə 0,5 faiz artaraq 8,64 milyona çatıb.
Hesabat dövrü ərzində 99,6 min ton ət, 363,7 min ton süd, 258,3 milyon ədəd toyuq yumurtası istehsal edilib.
2010-cu ilin ilk üç ayı ilə müqayisədə ət istehsalı cari ilin yanvar-martında 5,6 faiz, süd 9,3 faiz, toyuq yumurtası 13,3 faiz artıb.