Azərbaycan, Bakı, 19 may /Trend, müxbir A.Axundov/
2011-ci ildə Azərbaycanda həyat sığortası bazarı 30 milyon manat arta bilər. Bu barədə cümə axşamı Trend-ə Azərbaycan Sığortaçılar Assosiasiyasının (ASA) icraçı direktoru Azər Əliyev məlumat verib.
"Hələ istehsalatda peşə xəstəlikləri və bədbəxt hadisələr nəticəsində əmək qabiliyyətinin itirilməsindən icbari sığorta üzrə qanunun qəbulunadək biz həyat sığortası bazarının orta hesabla 30 milyon manat artacağını proqnozlaşdırmışdıq. Bu hesablamalar 1,2-1,5 milyon işləyən şəxsin olduğunu nəzərə almaqla aparılmışdı", - Əliyev deyib.
2010-cu ilin uyulunda Azərbaycan Prezidenti İlham Əliyev "İstehsalatda peşə xəstəlikləri və bədbəxt hadisələr nəticəsində peşə əmək qabiliyyətinin itirilməsi hallarından icbari sığorta haqqında" qanunu təsdiqləyib. Qanunun praktiki tətbiqinə bu ildən başlanıb.
2011-ci ilin yanvar-aprelində Azərbaycandakı həyat sığortası şirkətlərinin yığımları 10 milyon manata (istehsalatda peşə xəstəlikləri və bədbəxt hadisələr nəticəsində əmək qabiliyyətinin itirilməsindən icbari sığorta üzrə sığorta haqları 8,7 milyon manat, könüllü həyat sığortası 1,15 milyon manat) yaxınlaşıb. Halbuki ötən il bu rəqəm 1,457 milyon manat təşkil etmişdi.
Əliyevin sözlərinə görə, ilin sonunadək daha 20 milyon manat toplamaq tamamilə mümkündür.
"Prinsipcə, proqnoz özünü doğruldur. Artıq 10 milyon manata yaxın vəsait toplanıb və ilin sonunadək daha 20 milyon manat toplamaq tamamilə mümkündür. Ola bilsin ki, daha çox olacaq, lakin az olmayacağı dəqiqdir", - Əliyev bildirib.
Onun sözlərinə görə, istehsalatda peşə xəstəlikləri və bədbəxt hadisələr nəticəsində əmək qabiliyyətinin itirilməsindən icbari sığorta özündə çox məhdud paketi ehtiva edir, gələcək isə könüllü həyat sığortasınındır.
"Həyat sığortası yalnız qəbul etdiyimiz qanun çərçivəsində sığorta deyil. Biz anlamalıyıq ki, həyat sığortası sahəsi bizim bunu indi anladığımızdan geniş anlayışdır. Bu sığortanın zərəri ödəməyəcəyi ilə bağlı bir çox hallar baş verə bilər. Könüllü həyat sığortasının inkişafı dövlətin də, sığorta cəmiyyətinin də izlədiyi son məqsəddir", - Əliyev bildirib.
Onun sözlərinə görə, sığorta şirkətləri anlamalıdırlar ki, könüllü sığortanı inkişaf etdirmək lazımdır.
"Hələ bu barədə düşünməyən və bütün diqqəti yalnız icbari həyat sığortasına cəmləşdirən şirkətlər var. Bu, qətiyyən düzgün deyil və öz diqqətini yalnız icbari həyat sığortasına cəlb edir. Bu o qədər də düzgün deyil, lakin bunu başa düşmək olar. Bu il onlar diqqəti bu növə ayırırlar, sonralar, müqavilələr imzalananda və yenilənmə gedəndə onların digər növləri də inkişaf etdirmək üçün daha çox vaxtı, resursları olacaq", - Əliyev deyib.
Onun sözlərinə görə, könüllü sığortanın inkişaf etdirilməsi üçün vaxt lazımdır.
"Əgər hər şey bu cür aktiv rejimdə gedərsə, onda üç ildən sonra biz nəticələr əldə edəcəyik, 5-6 ildən sonra isə bunun dərk edilməsi, yəni daha keyfiyyətli iş əldə olunacaq. Hesab edirəm ki, həyat sığortası bizdə çox yaxşı inkişaf edəcək", - Əliyev bildirib.
Hazırda Azərbaycanda həyat sığortası üzrə istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə lisenziyaya malik cəmi üç şirkət fəaliyyət göstərir. Bunlar "Atəşgah Həyat", "Qala Həyat" və "Paşa Həyat" şirkətləridir.
Azərbaycanda ümumilikdə 28 sığorta və bir təkrar sığorta şirkəti fəaliyyət göstərir. Bütün şirkətlər ASA-nın üzvləridir. Sığortaçılar assosiasiyası 2006-cı ilin dekabrında təsis olunub.
Mayın 19-na olan rəsmi məzənnə 0,7903 AZN/USD təşkil edir.
