Azərbaycan, Bakı, 4 iyun /Trend, müxbir N.İsmayılova/
Türkiyənin "ISE Settlement and Custody Inc" şirkəti Azərbaycanın Milli Depozit Mərkəzinə (MDM) Avropa standartları əsasında klirinq sisteminin tətbiqi metodikasının işlənib hazırlanmasında kömək edir.
Avropa İttifaqının (Aİ) TACIS proqramının dəstəyi ilə MDM-ə Türkiyə şirkətindən məsləhətçilər - Alpər Yaquboğlu və İlkər Quşçu dəvət olunublar. Bu barədə MDM-in məlumatında deyilir.
Məsləhətçilər mayın 16-dan 25-dək bir sıra treninq və seminarlar keçiriblər, eləcə də MDM-in klirinq və hesablama sisteminin inkişafı üzrə tövsiyələr veriblər.
Son iki il yarım ərzində TACIS proqramı MDM, Qiymətli Kağızlar üzrə Dövlət Komitəsinin və Bakı Fond Birjasının qiymətli kağızlar bazarı infrastrukturunun inkişafı üzrə layihələrə dəstək göstərir.
MDM 1997-ci il sentyabrın 18-də yaradılıb. Mərkəzin təsisçisi və bütün səhm zərfinin mülkiyyətçisi kimi Azərbaycan Dövlət Əmlak Komitəsi çıxış edirdi. QKDK-nın yaradılmasından sonra MDM onun ixtiyarına verilib. Bununla əlaqədar olaraq MDM QKDK tərəfindən 1999-cu il sentyabrın 8-də yenidən təsis olunub və 1999-cu il sentyabrın 17-də dövlət qeydiyyatından keçib.
