Azərbaycan, Bakı, 17 iyun /Trend, müxbir İ.Xəlilova/
Azərbaycanda Sığorta Məcəlləsinin yaradılması zamanın tələbidir. Trend-in məlumatına görə, bu barədə maliyyə nazirinin müavini Azər Bayramov cümə günü parlamentin İqtisadi siyasət və Sosial siyasət komitələrinin birgə iclasında deyib. İclasda "Sığortanın icbari növləri haqqında" qanun layihəsi müzakirə edilib.
"Gələcəkdə "Sığortanın icbari növləri haqqında" qanunun bazasında Sığorta Məcəlləsinin yaradılması mümkündür, bu isə zamanın tələbidir. 10-15 il bundan əvvəl Azərbaycanda sığortanın 5 növü pərakəndə şəkildə fəaliyyət göstərirdisə, bu gün onlar vahid qanunla tənzimlənəcək", - Bayramov qeyd edib.
"Sığortanın icbari növləri haqqında" qanun layihəsi ikinci oxunuşda qəbul edilib və indi təkliflər nəzərə alınmaqla, xüsusi komissiya tərəfindən tamamlanır.
Ölkədə icbari sığortanın orta hesabla 9 növü fəaliyyət göstərir. Qanun layihəsi icbari sığortanın dörd növünü - daşınmaz əmlakın, avtonəqliyyat vasitələri sahiblərinin məsuliyyətinin, sərnişinlərin və daşınmaz əmlakın istismarı zamanı vətəndaş məsuliyyətinin sığortalanmasını tənzimləyir.
"Gələcəkdə sığortanın yeni qanunla tənzimlənən növlərinin siyahısına tibbi sığortanın da daxil edilməsi mümkündür", - Bayramov bildirib.
Parlamentin İqtisadi siyasət komitəsinin sədri Ziyad Səmədzadə ölkədə müxtəlif zaman kəsiyində Sığorta Məcəlləsinin yaradılmasının zəruriliyini təsdiq edib.
"Bununla əlaqədar bizim müəyyən fikirlərimiz var və biz onları müzakirə etməyə hazırıq", - Səmədzadə bildirib.
Hazırda ölkədə 28 sığorta, bir təkrar sığorta və 6 broker şirkəti fəaliyyət göstərir.
