Azərbaycan, Bakı, 23 iyun /Trend, müxbir N.İsmayılova/
Azərbaycanda Beynəlxalq Maliyyə Korporasiyasının (BMK) "Azərbaycanda və Orta Asiyada maliyyə infrastrukturunun gücləndirilməsi" layihəsi (ACAFI) çərçivəsində sertifikatlaşdırma və ilkin təhsil proqramı ölkədə menecment riski sahəsində 3 onlayn sertifikatlaşdırma mərkəzinin yaradılmasını nəzərdə tutur. Trend-in məlumatına görə, bu barədə cümə axşamı BMK-nın Azərbaycandakı layihəsinin əlaqələndiricisi Teymur Heybətov proqramın təqdimatında deyib.
"ACAFI layihəsi maliyyə müəssisələrinin əməkdaşları üçün risklərin idarə edilməsi sahəsində ilkin təhsilin tətbiqi yolu ilə risklərin idarə edilməsi üzrə sertifikatlaşdırılmış proqramın həyata keçirilməsini nəzərdə tutur. Proqramın iştirakçılarına beynəlxalq səviyyədə tanınan sertifikatlar veriləcək", - Heybətov bildirib.
Onun sözlərinə görə, sertifikatlaşdırmanı aparacaq beynəlxalq tərəfdaş kimi BMK GARP mərkəzini cəlb edib. Onun dünyanın 195 ölkəsində 150 mindən çox üzvü var. Mərkəz iki istiqamət - menecment riski və energetika risklərinin idarə edilməsi sahəsi üzrə sertifikatlaşdırma aparır. Layihə çərçivəsində GARP birinci istiqamət üzrə sertifikatlaşdırma aparacaq.
"GARP proqramın yerli tərəfdaşlarının məşqçilərini öyrədəcək, onların sertifikatlaşdırılmasını aparacaq və bu prqoram üzrə tədrisin spesifikliyi ilə tanış edəcək. Bu məqsədlə BMK 3 yerli tərəfdaş seçib. Bunlar Azərbaycan Bank Tədris Mərkəzi, ARPA və AMFA-dır", - o vurğulayıb.
Azərbaycan Bank Tədris Mərkəzi ilə saziş artıq imzalanıb, Azərbaycan Risk Peşəkarları Assosiasiyası (ARPA) və Azərbaycan Mikromaliyyə Təşkilatları Assosiasiyası (AMFA) ilə danışıqlar isə başa çatmaq üzrədir.
"Üç tərəfdaşın cəlb edilməsi onunla izah edilir ki, biz bazarda rəqabət yaratmaq istəyirik. Bu, maliyyə institutlarının geniş əhatə edilməsini və aşağı qiymətləri təmin edəcək", - qeyd edib.
Bundan əvvəl ARPA belə sertifikatlaşdırma aparıb, lakin buna yerli müəllimlər cəlb edilmədiyindən onun qiyməti kifayət qədər yüksək olub. Bu proqramın həyata keçirilməsi çərçivəsində gözlənilir ki, belə treninqlərin qiyməti xeyli aşağı olacaq. Yerli tərəfdaşlar BMK ilə müqavilə müddəti başa çatana kimi azı 100 nəfər üçün treninq keçirmək barədə öz üzərilərinə öhdəlik götürürlər.
Proqramın həyata keçirilməsinin ilk raundu 2011-ci il martın 14-də başlayıb və onun keçirilməsi 24 yanvar 2012-ci ilədək hesablanıb. Cari ilin sentyabr ayının 26-28-də məşqçilər üçün treninq, sentyabrın 30-da imtahan olacaq. 24 yanvar 2012-ci ildən 30 yanvar 2015-ci ilədək ikinci raund çərçivəsində bilavasitə maliyyə institutlarının işçilərinin tədrisi başlayacaq.
Heybətovun sözlərinə görə, ilkin olaraq treninqlər yazılı şəkildə aparılacaq, lakin proqramın həyata keçirilməsinin ikinci raundundan etibarən onların onlayn əsasa keçirilməsi gözlənilir. Sertifikatlaşdırma rus və ingilis dillərində aparılacaq, çünki bu layihə təkcə Azərbaycan üçün deyil, həm də bütün region üçün hesablanıb. Yerli tərəfdaşların imtahana hazırlığı Azərbaycan dilində aparmaq hüququ var. Lakin imtahanın dili hələ də ya ingilis, ya da rus dili olacaq. Azərbaycan proqram çərçivəsində treninq və sertifikatlaşdırmanın başlayacağı ilk ölkə olacaq.
Treninqlər 3 iş günü ərzində keçiriləcək. 90 dəqiqə davam edən imtahanda iştirakçılar 60 suala cavab verməlidirlər.
ACAFI layihəsinin məqsədi Orta Asiya (Qırğızıstan, Tacikistan və Özbəkistanda) və Azərbaycanda maliyyə bazarları infrastrukturlarının kredit məlumatı mübadiləsinin effektiv sisteminin yaradılması və maliyyə institutlarının əməkdaşları arasında risklərin idarə edilməsi sahəsində peşəkar tədrisin və sertifikatlaşdırmanın tətbiqi yolu ilə təkmilləşdirilməsidir. Layihənin fəaliyyəti maliyyə müəssisələrinə daha tez və düzgün kredit qərarlarının qəbul edilməsində kömək edəcək və beləliklə, fərdi istehlakçılar, eləcə də regiondakı kiçik və orta müəssisələr üçün maliyyə xidmətlərindən istifadəni artıracaq. Bu üçillik layihə İsveçrə hökuməti ilə əməkdaşlıq çərçivəsində həyata keçirilir.
