Azərbaycan, Bakı, 16 mart /Trend, müxbir A.Axundov/
2004-2011-ci illərdə Bakı Fond Birjasının (BFB) ticarət dövriyyəsi 90 dəfə artaraq 8430 milyon manata, bu dövr ərzində onun ÜDM-ə nisbəti isə 1 faizdən 17 faizə çatıb.
Trend-in məlumatına görə, bu barədə cümə günü Milli Məclisin plenar iclasında müzakirə edilən Nazirlər Kabinetinin 2011-ci ildə fəaliyyəti haqqında hesabatda deyilir.
Fond bazarından özəl sektorun maliyyələşdirilməsinin genişlənməsi imkanları bu dövrdə təşkil edilmiş bazarda korporativ qiymətli kağızların ticarət dövriyyəsinin həcminin 43 dəfə artmasına səbəb olub.
"Bu dövrdə səhmlər bazarında ticarət dövriyyəsinin 46 dəfə, korporativ istiqrazlar bazarında isə 40 dəfə artımı müşahidə edilib", - hesabatda qeyd edilir.
Son yeddi il ərzində dövlət qiymətli kağızlar bazarının həcminin 17 dəfə, dövlət istiqrazları bazarının 16 dəfə, Mərkəzi Bankın notlarının həcminin isə 18 dəfə artımı qeydə alınıb.
