Azərbaycan, Bakı, 8 oktyabr /Trend, müxbir A.Axundov/
Öz kapitallarını yeni normativ səviyyəyə qaldırmağa məcbur olan Azərbaycan bankları artıq konsolidasiya (birləşmək) barədə danışıqlara başlayıblar. Bu barədə bazar ertəsi Trend-ə Azərbaycan Mərkəzi Bankının (AMB) baş direktoru Rəşad Orucov bildirib.
"Bizdə olan məlumata görə, bu gün müxtəlif bank institutları arasında belə danışıqlar aparılır. Hələlik rəsmi müraciət yoxdur, hər şey danışıqlar mərhələsindədir", - Orucov deyib.
Onun sözlərinə görə, banklar beynəlxalq maliyyə institutları ilə də əlaqələrə girirlər.
"Biz buna yalnız sevinirik və bu prosesi dəstəkləyirik. Biz ölkənin bank sektorunun kapitallaşması prosesində beynəlxalq maliyyə institutlarının iştirakı strategiyasını çoxdan, kapitalın artırılması haqqında qərarın qəbul edilməsindən xeyli əvvəldən müzakirə edirik. Prinsip etibarilə, AYİB, Beynəlxaq Maliyyə Korporasiyası və başqa strukturlar da daxil olmaqla, beynəlxalq institutlarla sıx və çox yaxşı əməkdaşlıq var", - Orucov deyib.
AMB nümayəndəsinin sözlərinə görə, Beynəlxalq Maliyyə Təşkilatı Azərbaycan banklarının mümkün birləşməsi prosesində fəal iştirak edəcək.
