Azərbaycan, Bakı, 9 oktyabr /Trend, müxbir A.Axundov/
Azərbaycan Mərkəzi Bankı (AMB) ölkədə fəaliyyət göstərən bankların problemli aktivlərinin payında azalma qeydə alır.
"Biz bankların problemli aktivlərində artım müşahidə etmirik. Onların payı kifayət qədər orta həddədir. Hesab edirik ki, hazırda bankların bu problemin öhdəsindən gəldiyi və stabilləşmənin getdiyi bir dövr başlayır və biz problemli aktivlərin payının azalması meylini müşahidə edirik", - AMB-nin baş direktoru Rəşad Orucov çərşənbə axşamı Trend-ə bildirib.
Onun sözlərinə görə, hazırda banklar bu məsələni həll etmək üçün lazım olan hər şeyi edirlər.
"Bu problemlərin həll olunması üçün bir qədər vaxt lazımdır. Təmiz inzibati prosedurlar - məhkəmələr, girovların alınması, onların satışı müəyyən vaxt tələb edir. Hazırda biz xüsusi həyəcanlı vəziyyət görmürük", - Orucov deyib.
Onun sözlərinə görə, azalma tendensiyası gələn il davam edəcək.
"Bu tendensiya gələn il də davam edəcək, belə ki, ümumi fon, ümumi iqtisadi vəziyyət çox yaxşıdır. Hazırda iqtisadi artım əsasən qeyri-neft sektorunun hesabına təmin olunur ki, bu da çox vacibdir. Banklarımız qeyri-neft sektoruna xidmət edir və onu maliyyələşdirir, ona görə də fon çox müsbətdir", - Orucov bildirib.
Azərbaycanda 43 bank fəaliyyət göstərir.