Azərbaycan, Bakı, 29 oktyabr /Trend, müxbir C.Nəsibova/
Azərbaycanda qeyri-neft sektorunun inkişafı, əsasən, ölkə regionlarında istehsalatın inkişafından asılıdır. Trend-in məlumatına görə, bu barədə bazar ertəsi jurnalistlərə Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) baş katibi Məmmədəli Əfəndiyev deyib.
"Qeyri-neft məhsullarının ixracının inkişafı deyəndə, kənd təsərrüfatı mallarının ixracı nəzərdə tutulur", - Əfəndiyev bildirib.
Onun sözlərinə görə, kənd təsərrüfatı məhsullarının istehsalı zamanı müasir texnika və texnologiyalardan istifadə vacibdir. Burada məqsəd ixrac edilən məhsulların beynəlxalq standartlara cavab verməsidir.
"Yalnız bu halda yerli məhsullar dünya bazarlarında öz yerini tutacaq", - ASK-nın baş katibi qeyd edib.
O deyib ki, Azərbaycan hazırda Avropaya kənd təsərrüfatı məhsulları, o cümlədən meyvə şirələri, yüngül sənaye məhsulları və suvenirlər ixrac edir.