Azərbaycan, Bakı, 24 dekabr /Trend, müxbir İ.Xəlilova/
Azərbaycan Mərkəzi Bankı (AMB) ölkədə ipoteka kreditləşdirilməsi şərtlərinin yaxşılaşdırılmasına dair hazırlanan dəyişikliklər çərçivəsində ipoteka üzrə faiz dərəcələrinin azaldılmasını gözləmir. Bu barədə bazar ertəsi Trend-ə AMB-nin baş direktoru Rəşad Orucov deyib.
"Azərbaycanda sosial ipoteka üzrə tətbiq edilən 4 faizlik dərəcə dünyada ən aşağı dərəcələrdən biri hesab edilir. Hazırda Rusiyanın İpoteka Krediti üzrə Dövlət Agentliyi faiz dərəcəsinin 12 faizə çatdırılmasını müzakirə edir. Azərbaycanda dərəcələrin azaldılması məqsədəuyğun deyil", - Orucov qeyd edib.
Onun sözlərinə görə, banklar da mövcud dərəcədə kreditləşdirməni davam etdirməkdə maraqlıdırlar, çünki ipoteka kreditlərinin verilməsində onların aldığı marja 3 faiz təşkil edir, üstəlik onlar kreditin verilməsi riskini üzərilərinə götürməli, ona 25 il ərzində xidmət etməlidirlər.
"İpoteka kreditləşdirilməsi şərtlərinin dəyişdirilməsinə dair təkliflər çərçivəsində adi və sosial ipoteka daxilində kreditin maksimum məbləğinin artırılması imkanı, sosial ipoteka alan şəxslərin dairəsinin genişləndirilməsi nəzərdən keçirilir", - AMB-nin baş direktoru bildirib.
