Azərbaycan, Bakı, 12 mart /Trend, müxbir A.Axundov/
Beynəlxalq Valyuta Fondu (BVF) Azərbaycana qeyri-neft büdcə kəsirini azaltmağı tövsiyə edir. Trend-in məlumatına görə, bu barədə çərşənbə axşamı Fondun Yaxın Şərq və Mərkəzi Asiya regionu üzrə departamentinin məsləhətçisi Raca Almarzoqi BVF nümayəndə heyətinin Bakı səfərinin yekunlarına dair təşkil olunan mətbuat konfransında bildirib.
Almarzoqinin başçılığı ilə BVF nümayəndə heyəti fevral ayının 26-dan etibarən Bakıda səfərdədir. Səfərin əsas məqsədi Azərbaycan hökuməti ilə "BVF-in yaradılması haqqında" razılaşmanın 4-cü bəndi ilə bağlı məsləhətləşmələr aparmaqdır.
"Əgər iri büdcənin saxlanmasına dair planlar gələcəkdə də icra olunsa, onda bu, Azərbaycanın neftdən asılılığını artıracaq, həmçinin dövlət büdcəsinin effektivliyi ilə bağlı narahatlıqlar doğuracaq. Dövlət xərclərinin azaldılması, ilin ortasında büdcəyə dəyişikliklərdən qaçmaq, vergilərin ödənilməsindən boyun qaçırma faktlarının qarşısının alınması özəl sektora öz gücü hesabına inkşaf etməyə imkan verməklə yanaşı, fiskal sahənin zəif cəhətlərini tədricən aradan qaldıracaq", - Almarzoqi bildirib.