Azərbaycan, Bakı, 15 aprel /Trend, müxbir A.Axundov/
Yaponiya hökuməti Azərbaycanda meliorasiya və irriqasiya avadanlıqlarının təkmilləşdirilməsinə 777 milyon yen və ya 7,45 milyon dollar həcmində qrant ayıracaq. Trend-in məlumatına görə, bu barədə bazar ertəsi Yaponiyanın Azərbaycandakı səfirliyinin yaydığı məlumatda deyilir.
Məlumata görə, qrant sazişi aprelin 17-də Bakıda imzalanacaq. Müvafiq sənədləri Yaponiyanın Azərbaycandakı fövqəladə və səlahiyyətli səfiri Şusuke Vatanabe, Baş nazirin müavini Abid Şərifov, həmçinin Yaponiya Beynəlxalq Əməkdaşlıq Agentliyinin Özbəkistandakı nümayəndəliyinin rəhbəri Masao Şikano və "Meliorasiya və Su Təsərrüfatı" ASC-nin sədri Əhməd Əhmədzadə imzalayacaqlar.
Vəsait Yaponiya hökumətinin Ümumi Qrant Yardımı Proqramı çərçivəsində ayrılacaq. Qrant vəsaiti hesabına yeni ekskavatorlar, buldozerlər, həmçinin meliorasiya və suvarma üçün nəzərdə tutulmuş digər avadanlıqlar alınacaq.
Yeni qrant nəzərə alınmaqla, Yaponiya hökuməti 1999-cu ildən etibarən 7 layihə çərçivəsində Azərbaycana 3,79 milyard yen (təqribən 34 milyon dollar) dəyərində vəsait ayırıb.
