Azərbaycan, Bakı, 27 iyul /Trend, müxbir İ.Xəlilova/
Kart məhsulları sektorunu genişləndirmək və POS-terminal şəbəkəsinin artırılması məqsədi ilə Bank Respublika VISA International-dan ticarət və e-kommersiya üçün ekvayrinq lisenziyaları alıb.
Bankdan Trend-ə verilən məlumata görə, tərəfdaşlar şəbəkəsinin ödənişlər üçün plastik kartları qəbul etmək istəklərini, habelə nağdsız ödənişlərin müştərilər üçün aşkar üstünlüklərini nəzərə alaraq, bank "VISA International" kartlarının ekvayer statusunu almaq qərarına gəlib.
İndi Bank Respublika öz POS-terminallarını quraşdıra biləcək, bununla da müştərilərini məhsul və xidmətləri VISA kartları vasitəsilə ödəmək imkanı ilə təmin edəcək. Bu lisenziya banka imkan yaradır ki, vasitəçilərə müraciət etmədən kommersiya müəssisələri ilə POS-terminalların quraşdırılması və xidməti üzrə müqavilə bağlasın. Beləliklə, bank internetdə məhsul və xidmətlərin ödənilməsi üçün "virtual" POS-terminallarını da quraşdıra bilər.
"Bank Respublika" plastik kartlarının daha bir üstünlüyü onların pulsuz verilməsidir. Bundan əlavə, VISA kartları daxil olmaqla Bank Respublikanın bütün plastik kartları 50-yə yaxın tərəfdaşı olan "PayKart" bonus sisteminə qoşulub.
