Azərbaycan, Bakı, 4 sentyabr /Trend, müxbir E.Əliyev/
"FINCA Azerbaijan" bank olmayan kredit təşkilatı ölkədə filial şəbəkəsini xeyli genişləndirməyi planlaşdırır. Trend-in məlumatına görə, bu barədə çərşənbə günü şirkətin direktoru Maniş Sane təşkilatın 2013-cü ilin ötən dövrü ərzində fəaliyyətinə həsr edilmiş mətbuat konfransında deyib.
Sanenin sözlərinə görə, FINCA 1998-ci ildə Azərbaycanda fəaliyyətini Bakıda bir filialla başlayıb: "Hazırda ölkənin bütün regionlarında 30 filial və 33 subfilialla təmsil olunmuşuq".
Sane deyib ki, bu tendensiyalar gələcəkdə də saxlanılacaq.
Onun sözlərinə görə, 2013-cü ilin əvvəlindən Ağsu və Siyəzəndə təşkilatın filialları açılıb: "Sentyabrın 18-də "FINCA Azerbaijan"ın Binəqədi filialı açılacaq. Bundan başqa, cari ilin sonunadək subfiliallardan birinin fəaliyyətini filial səviyyəsinədək genişləndirməyi, 2014-cü il ərzində isə regionlarda daha beş subfilial açmağı planlaşdırırıq. Məqsədimiz ucqar yaşayış yerlərində olmalarına baxmayaraq, müştərilərə daha yaxın olmaqdır".
