Azərbaycan, Bakı, 3 aprel /Trend, müxbir E.Əliyev/
Azərbaycanda sərbəst gömrük anbarlarının yaradılması ölkənin tranzit imkanlarını aktivləşdirə bilər. Trend-in məlumatına görə, bu barədə Azərbaycanda Amerika Ticarət Palatasının ("AmCham Azerbaijan") illik dərc etdiyi 2014-cü ildə Azərbaycanda işgüzar mühitin inkişafı üzrə təkliflər zərfində deyilir.
Məlumatda bildirilir ki, "AmCham" Azərbaycanda belə anbarların konsepsiyasının təqdim edilməsi ideyasını dəstəkləyir: "Həmin anbarların tətbiqi bir tədarükçüdən, lakin müxtəlif mənbələrdən və ya müxtəlif vaxtda kiçik həcmdə yüklər alan sahibkarlara onları birləşdirməyə və belə malları gömrükdə bir yük kimi rəsmiləşdirməyə imkan verəcək".
Palata qeyd edir ki, belə mexanizm idxalçıların nəqliyyat xərclərini xeyli azaltmağa və sahibkarların ABŞ-dan Asiyaya malların iri tranziti üzrə imkanlarını genişləndirəcək.
"AmCham"ın məlumatında deyilir: "Belə yanaşma ölkənin regional nəqliyyat qovşağına çevrilməsini sürətləndirəcək. Bundan başqa, Azərbaycanın beynəlxalq ticarətdə iştirakının inkişafı Beynəlxalq alqı-satqı üzrə Vyana Konvensiyasına qoşulmasına dair danışıqların başlamasına xidmət edir. Bu da öz növbəsində, beynəlxalq tərəfdaşlarla danışıqlarda daha sərfəli şərtləri və nəticələri təmin edəcək".