Azərbaycan, Bakı, 23 iyul /Trend, müxbir Zülfiyyə Qurbanova/
İlin sonuna kimi Almaniya-Azərbaycan Fondunun (AAF) tərəfdaş banklarından onlara kiçik və orta sahibkarlığın maliyyələşdirilməsi üçün kredit şəklində verilmiş vəsaitlər geri çağırıla bilər. Bu barədə Trend-ə Almaniyanın KfW İnkişaf Bankının Bakı ofisindən bildiriblər.
AAF-ın fəaliyyəti onun vəsaitləri hesabına maliyyələşdirilir.
Bu addım Azərbaycan hökumətinin fondun gələcək fəaliyyəti ilə bağlı atacağı addımdan asılıdır.
Məlum olduğu kimi, ölkənin Maliyyə Nazirliyi ilə AAF-ın meneceri olan Almaniyanın Beynəlxalq Əməkdaşlıq üzrə Əmanət Kassaları Fondunun (SBFIC) müqaviləsinin fəaliyyət müddəti 2014-cü ilin sonunda başa çatır. Və hazırda Maliyyə Nazirliyi AAF-ın gələcək taleyini müvafiq strukturlarla müzakirə edir.
KfW-nin Bakı ofisindən deyiblər ki, əgər Azərbaycan tərəfi fondu idarə edənin xidmətlərini maliyyələşdirməyə razı olarsa, onda o özünün hazırkı statusunu saxlaya bilər: "Hələlik SBFIC ilə müqavilənin müddətinin uzadılacağı, fondun vəsaitlərinin ölkədə kiçik və orta sahibkarlığın maliyyələşdirilməsi ilə məşğul olan digər fonda və ya dövlət büdcəsinə keçiriləcəyi məlum deyil. Hətta öz fəaliyyətini hazırkı statusda davam etdirəcəyi halda Azərbaycan hökumətinin balansına verilməsi ilə əlaqədar fondun adı dəyişdirilə bilər".
Hazırda KfW və AAF Azərbaycanın Maliyyə Nazirliyinin qərarını gözləyir.