Azərbaycan, Bakı, 24 iyul /Trend, müxbir İlahə Məmmədli/
Azərbaycanda fəaliyyəti 2012-ci ilin əvvəlində dayandırlmış Kredit Zəmanət Fondunun (KZF) işinin bərpa edilməsi İsveçrənin İqtisadi məsələlər üzrə Dövlət Katibliyinin (SECO) ölkənin aqrar sektorunu qiymətləndirməyi başa çatdırmasından sonra mümkündür.
Almaniyanın KfW İnkişaf Bankının (vəsaitləri hesabına Fond yaradılıb) Bakı ofisindən cümə axşamı Trend-ə deyiblər ki, SECO ilə araşdırmaların başlanılması haqqında razılıq əldə edilib ki, bu da Kredit Zəmanət Fondunun fəaliyyət konsepsiyasını konkretləşdirməyə imkan verəcək.
Bankın ofisindən qeyd ediblər ki, KZF-nin yeni konsepsiyası Azərbaycanın İqtisadiyyat və Sənaye Nazirliyi ilə ilkin olaraq razılışdırılıb və təsdiqlənməsi üçün Almaniyanın Federal İqtisadi İnkişaf və Əməkdaşlıq Nazirliyinə ərizə təqdim edilib.
2006-cı il avqustun 14-də Bonnda Azərbaycan-Almaniya hökumətlərarası danışıqlarında KfW-nin Kredit Zəmanət Fondunu maliyyələşdirməsi haqqında müqavilə imzalanmışdı.
Bankdan deyiblər ki, KZF-nin iş konsepsiyası dəqiqləşdirildikdən sonra bu müqaviləni də yeniləmək planlaşdırılır.
Bankın ofisindən bildiriblər ki, dünya maliyyə böhranının başlamasından öncə hazırlanmış zəmanət mexanizmi özünü doğrultmadı: "Fondun fəaliyyətə başlaması maliyyə böhranının dərinləşməsi ilə üst-üstə düşdü, buna görə də xarici bankların likvidliklə bağlı problemləri, Azərbaycan Mərkəzi Bankının tətbiq etdiyi məhdudiyyətlər səbəbindən yerli banklar xarici kreditlərin cəlb edilməsi üçün KZF-nin zəmanətindən istifadə edə bilmədilər. Böhran yekunlaşdıqdan sonra isə xarici kreditlərin cəlb edilməsi şərtləri dəyişdi, Azərbaycan bankları böyüdü və buna müvafiq olaraq KZF-nin vəsaitləri bir banka zəmanət vermək üçün kifayət qədər idi ki, bu da layihənin məqsədinə uyğun gəlmirdi".
Yeni konsepsiyaya əsasən, zəmanətlər son alıcıya yerli banklardan kredit şəklində veriləcək, yəni onların xarici banklar tərəfindən borclanması nəzərdə tutulmur. Zəmanətli kreditlər borcların ödənilməsi ilə bağlı kiçik problemlərin olduğu kənd təsərrüfatı üçün nəzərdə tutulur. Banklar yüksək risklər səbəbindən aqrar-sənaye kompeksini həvəslə maliyyələşdirmirlər.
