Azərbaycan, Bakı, 15 sentyabr /Trend, müxbir Azad Həsənli/
2014-cü ilin avqustunda Azərbaycanda istehlak mallarının qiyməti və xidmət tarifləri əvvəlki ayla müqayisədə dəyişməyib, 2013-cü ilin yanvar-avqust aylarına nisbətən isə inflyasiya 1,4 faiz təşkil edib. Trend-in məlumatına görə, bu barədə Dövlət Statistika Komitəsinin 8 ayın yekunkarı üzrə hesabatında deyilir.
Məlumata görə, 2013-cü ilin yanvar-avqust aylarında illik inflyasiya 2,2 faiz təşkil edib, avqust ayı ərzində isə 0,3 faiz səviyyəsində deflyasiya müşahidə olunub.
Avqustda ərzaq mallarının qiymətləri 0,1 faiz ucuzlaşıb, qeyri-ərzaq malları və xidmət tarifləri isə dəyişməz qalıb.
2013-cü ilin yanvar-avqust ayları ilə müqayisədə cari ilin 8 ay ərzində ərzaq mallarının qiymətləri 0,8 faiz artıb, qeyri-ərzaq malları 3,6 faiz, xidmət sahəsində tariflər isə 0,4 faiz bahalaşıb.
Avqustda mal və xidmətlər çıxmaqla hesablanan, mövsümi dəyişikliklərə məruz qalan (meyvə və tərəvəzlər) istehlak qiymətlərinin bazis indeksi və dövlətin tənzimlədiyi qiymətlər əvvəlki ayla müqayisədə 0,1 faiz azalıb, ötən ilin yanvar-avqust aylarına nisbətən isə monetar inflyasiya 1,8 faiz təşkil edib.