Azərbaycan, Bakı, 14 oktyabr /Trend, müxbir İlahə Məmmədli/
Azərbaycan Mərkəzi Bankı (AMB) ilin sonunadək ölkədə istehlak kreditlərinin əlavə tənzimlənməsi üçün yeni tənzimləyici normativlər tətbiq etməyə hazırlaşır. Bunu Trend-ə AMB-nin baş direktoru Rəşad Orucov deyib.
Onun sözlərinə görə, bu əlavə tədbirlər hər bir kredit götürənin risklərinin minimuma endirilməsi üçün nəzərdə tutulub, bununla əlaqədar borclunun üzərinə götürə biləcəyi öhdəliklərə (kreditlər üzrə aylıq ödənişlər) uyğun olaraq onun gəlirləri üzrə yeni normativlər tətbiq olunacaq: "Hazırda normativin həcmi dəqiqləşdirilir".
R.Orucov qeyd edib ki, yeni normativin tətbiqi banklardan əlavə kapitallaşmanı tələb edəcək, yəni istehlak kreditləri ilə məşğul olmaq üçün banklara böyük həcmdə kapital lazım olacaq: "Bu, kapitalın adekvatlığına qarşı tələbə də aiddir. Əgər hazırda kreditlər 100 faiz dərəcəsi üzrə ölçülürsə, yəqin ki, istehlak kreditləri 120 faiz dərəcəsi üzrə ölçüləcək ki, bu da prinsipcə bankların bu fəaliyyətlə məşğul olmaq stimulunu məhdudlaşdıracaq".
AMB-nin baş direktoru deyib: "Biz banklara istehlak kreditlərinin verilməsi ilə məşğul olmağı qadağan etmirik, lakin bu, (yeni normativin tətbiqi) kapitalın adekvatlığı üzrə yeni dayaq tələb edəcək ki, bu da bankların kapitalına qarşı ümumi tələblərə aid deyil. Lakin bu tələblər istehlak kreditlərinin verilməsində bankların imkanlarını azaldır".
Mərkəzi Bankın kapitalın adekvatlığına qarşı mövcud tələbləri 12 faiz, Bazel komitəsinin isə 8 faiz təşkil edir.
Onun sözlərinə görə, AMB-nin istehlak kreditləri üzrə daha əvvəl qəbul etdiyi bütün tənzimləyici tədbirlər qüvvədə qalacaq və bu sahədə bankların fəaliyyətinə qarşı əlavə tələblər irəli sürüləcək. Banklar avtomobil kreditlərini verərkən də yeni tələblərə riayət etməlidirlər.
