Azərbaycan, Bakı, 17 oktyabr /Trend, müxbir İlahə Məmmədli/
Azərbaycanın bank sisteminin kapitallaşmasının ikiqat artması xarici investorlar üçün müsbət işarə oldu. Xarici banklar Azərbaycana gəlmək üçün yenidən maraq göstərməyə başladılar. Bunu Trend-ə Azərbaycan Mərkəzi Bankının baş direktoru (AMB) Rəşad Orucov deyib.
Hər bir bankın kommersiya tərkibinə əsaslanaraq bu bankların adlarını çəkməkdən imtina edən R.Orucov qeyd edib ki, hazırda danışıqlar aparılır və onların hamısı Azərbaycanda törəmə banklarını açmaq istəyirlər.
Bununla belə, o, Türkiyənin iri "İş Bankası"nın Azərbaycanın bank bazarına çıxmaq planlarını saxlaması barədə məlumat verib. "İş Bankası" artıq bir neçə dəfə bu barədə açıqlama verib.
AMB-nin baş direktoru əlavə edib ki, Türkiyə bankının Azərbaycan bazarına tezliklə çıxması gözlənilir, bank bunun üzərində fəal işləyir: "Bazara çıxmağın mümkün variantlarından biri yerli bankın satın alınmasıdır. Biz bunu və "İş Bankası"nın ayrıca törəmə bankının açılması imkanını istisna etmirik".
Azərbaycan banklarının xarici bazarlara çıxmasına toxunan R.Orucov bildirib ki, bu, onların hər birinin kommersiya strategiyasından asılıdır: "Banklar bu və ya digər bazarlarda nə qədər rəqabət apara və təqdim etdikləri xidmət və servisləri nəzərə almaqla müştəri toplaya bilmələrinə baxırlar. Banklar digər bazarlara çıxmaq istəyirlərsə, ümumilikdə AMB bankların hazırlığı və bunun bankın maliyyə davamlılığına necə təsir edə bilməsi baxımından onların təkliflərinə baxmağa hazırdır".
Qeyd edək ki, hazırda Azərbaycanda 44 bank fəaliyyət göstərir, bunların 22-si xarici kapitalla işləyənlərdir.
