Bakı. Trend:
2022-ci ilin yanvar-oktyabr aylarında Bakı Beynəlxalq Dəniz Ticarət Limanında yük aşırması 5,456 milyon tonu ötüb ki, bu da 2021-ci ilin eyni dövrü ilə müqayisədə 14 faiz çoxdur.
Trend-in məlumatına görə, bunu bu gün Bakı limanının mətbuat xidmətinin rəhbəri Elmar Həbibli deyib.
Onun sözlərinə görə, hesabat dövründə 44 mindən çox TEU konteyner aşırılıb, bu isə 2021-ci ilin yanvar-oktyabr ayları ilə müqayisədə 28 faiz çoxdur.
"Bundan başqa, təkərli texnikanın aşırılması 31,5 faiz artaraq 41 mini ötüb, sərnişin avtomobillərinin aşırılması 6 dəfə artıb", - deyə o bildirib.
E.Həbibli vurğulayıb ki, Azərbaycana yüklər əsasən Mərkəzi Asiya ölkələrindən daxil olur və tranzitlə Avropaya yola salınır.
"Daxil olan yüklərin 90 faizdən çoxu ixraca yönəlir", - o əlavə edib.