2005-ci ilin yanvar-iyun ayları ərzində Dövlət Gömrük Komitəsi (DGK) 2527-dən artıq hüquq pozuntusu faktı aşkar edib ki, bu da 2004-cü ilin analoji dövrü ilə müqayisədə 1227 fakt çoxdur.
DGK-dən Trend ə verilən məlumata görə, bu tədbirlər nəticəsində 81 nəfər saxlanılıb.
Gömrük sərhəddindən qanunsuz keçirilməsinin qarşısı alınan qaçaqmalçılıq əşyalarının dəyəri 1 milyard 482,3 milyon manat (315,181 min dollar) təşkil edib.
Eyni zamanda bu dövrdə gömrük orqanları külçə və qızıl əşyaları şəklində 12 kq 915 qram qızıl, 68 kq 232 qram gümüş, 30 karatlıq brilyant daşlar və 15510 min ABŞ dolları müsadirə ediblər.
DGK-nin "Narkotik maddələrin və narkotik maddələrin qanunsuz dövriyyəsi ilə mübarizə üzrə proqram"a müvafiq olaraq keçirdiyi əməliyyat tədbirləri nəticəsində bu dövr ərzində narkotiklərin qanunsuz dövriyyəsi üzrə 33 fakt aşkarlanıb ki, bu zaman 15 kq 722 qram narkotik maddə, o cümlədən 5 kq 563 qram tiryək, 4 kq 872 qram marixuana, 5 kq həşiş, 284 qram heroin, 110 vahid psixotrop maddə (ampul, kapsul və həb şəklində) tutulub.
Cari ilin 6 ayı ərzində 2449 fakt üzrə gömrük qaydalarının pozulmasına görə 365 hüquqi şəxs (o cümlədən 88 əcnəbi hüquqi şəxs) və 2083 fiziki şəxs (o cümlədən, 365 əcnəbi şəxs) inzibati iməsuliyyətə cəlb edilib.
Bu fakt üzrə həmin şəxslər 1 milyard 321 milyon manat (280,884 min dollar) cərimə olunmuş, eyni zamanda , onlardan 750,4 milyon manatlıq mal müsadirə olunub.
Bundan başqa, ölkə prezidentinin "Alkoqollu içkilər və tütün məmulatlarının istehsalı, idxalı və satışının nizamlanmasına dair əlavə tədbirlər barədə" fərmanına müvafiq olaraq xaricdə istehsal olunmuş 60 litr qanunsuz spirt, 2004 ədəd spirtli içki, 2 milyon 262 min ədəd siqaret saxlanılmış və bu istiqamətdə müəyyən tədbirlər görülüb.
